Sealant o panapak sa atop gihulip sa rugby

CEBU, Philippines - Naalarma ang Hunta Probinsiyal sa Sugbo sa taho nga ang usa ka matang sa pangtapak sa mga buslot sa atop ug mga tubo o sealant mao na karon ang gikabuangan sa mga minor de edad hulip sa rugby.

Usa sa nakapaalarma sa mga opisyal nga walay ordinansang nagmando sa pag-regulate sa pagbaligya niini hinungdan sa pagsumitir og resolusyon ni Bokal Jude Thaddeus Durano-Sybico ug Carmen Remedios Durano-Meca nga nag-awhag sa Department of Trade and Industry sa paghimo og tukmang lakang.

Buot sa hunta nga mandoan sa DTI ang mga tindahan og sealants paghimo sa ilang corporate social responsibility nga dili mabaligyaan ang kabataan sa maong kemikal.

Unang gikataho ang paghitak sa kabataan nga naghingos niini sa dakbayan sa Mandaue diin adunay ordinansa nga nag-regulate sa pagpamaligya og rugby o solvent. Si Police Chief Insp. Michael Anthony Bastes, ang hepe sa Investigation and Detection Management Branch (IDMB) sa Mandaue City Police Office (MCPO) sa sayo pa miingon nga walay ordinansa nga nag-regulate sa sealant nunot sa pagtoo sa mga lokal nga opisyal nga dili kini gamiton sa mga libud suroy nga kabataan.  (BANAT NEWS)