2 motorsiklo nagsungag duha ang namatay

CEBU, Philippines - Duha ang patay usa niini kanhi kagawad ug laing usa pa ang talandugon ang kahimtang sa binanggaay sa duha ka nagkasugat nga motorsiklo sa sitio Tingtingon sa barangay Maricaban sa lungsod sa Sta. Fe niadtong Miyerkules sa alas 6:00 sa sayong gabii.

Ang unang biktima mao ang drayber sa Honda XRM nga motorsiklo nga si Ricky Villaceran, kolektor sa Big-8 Lending Firm nga nagbase sa barangay Talisay.

Samtang ang laing biktima mao ang drayber sa Russi Ramstar motorcycle nga si Jinnefer Illut, 42, kanhi kagawad sa barangay Okoy ug naangol usab ang angkas niining si Ralph Gilbuena, 24.

Matud ni PO2 Oscar Badilla sa Sta. Fe Police Station dihang nahinabi sa Banat News nagsugat ang duha ka motor  diin si Villaceran paingon sa Sta. Fe samtang si Illut padulong sa Bantayan Proper.

Apan pag-abot sa maong lugar gikatahong mi-overtake si Illut sa kaubang motorsiklo nga nag-una ug mikawat sa agianan ni Villaceran hinungdan sa ilang panagsungag.

Tungod kay pulos kusog ang dagan sa duha ka motor dihang nagkabanggaay lagyo og gilagpotan ug mitugpa sa semento ang mga sakay niini, gikatahong patay dihadiha pagtugpa si Illut apan si Villaceran giingong nakabarog pa ug mibarag dayon natumba og balik.

Ang tulo daling gidala sa Bantayan District Hospital apan gideklarar nga dead on arrival si Villaceran ug Illut samtang ang angkas nga si Gilbuena gitabang sa tambalanan.

Sumala gihulagway sa kapulisan nga ngitngit nga lugar ang nahitabuan og kusog usab ang ilang pagpadagan sa motor nga pulos way helmet. (Darrel A. Carumba/EIM)

Duha ka dagkong international  events himuon dinhi sa Sugbo

Ni Chester Abadilla

Laing international event ang ipahigayon dinhi sa Sugbo karong sunod bulan nga mao ang 13th Association of South East Asian Nations (ASEAN) -Information and Communications Technology  Senior Officials Meeting ug 12th ASEAN Telecoms and IT Ministers Meeting.

Kini maoy gibutyag sa tsirman sa substance Committee sa ASEAN-ICT Meeting nga si Philip Varilla atol sa pagbisita niini ngadto sa buhatan ni Gov. Gwendolyn Garcia.

Sigon pa ni Varilla nga ang duha ka kalihukan dungan nga pagahimuon sa usa ka dakong hotel dinhi sa siyudad sa Sugbo karong Nobiyembre 12 hangtud sa Nobiyembre 16, 2012.

Si Varilla nga gikuyugan sa ubang mga organizers sa maong kalihukan nagkanayon nga nangayo sila og suporta sa Kapitolyo alang sa kalampusan sa maong kalihukan.

Usa sa mga highlights sa nahisgutang tigum mao ang Gala Dinner ngadto sa Cebu International Convention Center sa siyudad sa  Mandaue nga giandam sa  Kapitolyo alang sa mga manambong. (BANAT NEWS)