Yapha maglisod kontra ni Garcia sa 3rd District

CEBU, Philippines - Maglisud si Pinamungajan Mayor Geraldine Yapha sa Liberal Party pagtarug sa iyang kaatbang sa pagka-kongresista sa ikatulong distrito sa lalawigan sa Sugbo nga si Gob. Gwendolyn Garcia sa One Cebu party.

Kini ang napanglantawan sa kaalyado ni Garcia, Bokal Alex Binghay, kinsa gikatahong nakapanukad na unta sa iyang planong pagpapili sa pagka-kongresista sa nahisgutang distrito.

Matud pa ni Binghay suhito siya sa sentimiyento sa katawhan sa ikatulong distrito sanglit taud-taud na siyang naglibot niini. Una na hinuong giangkon ni Yapha nga ‘underdog’ siya kang Garcia.

Laing gitumbok ni Binghay mao ang kalig-on pa sa organisasyon sa One Cebu party sa ilang distrito nga usa sa masandigan ni Garcia.

 “Mao na’y ako sad kabalak-an, mobiya ko sa One Cebu, magbuhat na sad ko og laing organization. I need more money, buslot man ni akong bulsa,” sumala pa ni Binghay kinsa sa sayo pa miingon nga mokandidato pagkakongresista bisan di siya paluyohan sa One Cebu.

Taud-taud nga nagpakahilom si Binghay human mideklarar si Garcia nga dili na modagan sa pagka-senador.Si Binghay gikatahong maoy mihangyo ni Garcia nga dili na lang mopadayon sa pagka-senador ug mag-kongresista na lang kini sa ikatulong distrito.

Ang ikatulong distrito nga karon girepresentahan ni Kong. Pablo John Garcia gilangkuban sa dakbayan sa Toledo ug mga lungsod sa Barili, Aloguinsan, Pinamungajan, Balamban, Asturias ug Tuburan.

Si Pablo John maoy kandidato sa One Cebu sa pagka-gobernador atbang ni Hilario Davide III sa LP. Gawas sa Pinamungajan, ang mga mayor sa Barili ug Tuburan lang ang kaalyado ni Yapha.  (BANAT NEWS)