Pagpanigarilyo ni P.Noy di makaapekto sa suporta niini sa Sin Tax Bill— Palasyo

CEBU, Philippines - Wala panumbalinga sa Palasyo ang panawagan sa pipila ka mga grupong pabor sa mas higpit nga Sin Tax Bill nga agi og pagpakita og suporta kinahanglang biyaan ni Presidente Benigno Aquino III ang pagpanigarilyo.

Nagmartsa kagahapon (Biyernes) ang mga nagkadaiyang health advocates atubangan sa buhatan sa Commission on Human Rights ug mihagit kang Aquino nga mohunong na sa pagpanigarilyo.

Si deputy presidential spokeswoman Abigail Valte nagkanayon nga personal nga kabubut-on sa pangulo ang nahisgutang hagit apan giklaro niyang ang pagpanigarilyo sa pangulo dili babag sa pagsuporta niini nga mapasar ang sin tax bill, matud pa sa report sa ABS-CBN News.Com.

Ang Malacañang dayag kaayong misuporta sa pagpatuman og mas higpit nga pagsingil og buhis sa mga produktong sama sa sigarilyo ug bino sa tuyo nga makakuha og dakong pundo.

Ang pundo unyang makolekta gikan sa mga naghimo niini gamiton sa universal health programs sa gobiyerno aron dunay magamit ang mga tambalanan sa pagpatambal sa mga tawong nagkasakit tungod sa pagpanigarilyo ug pag-inom og bino.

Ning bag-ohay lang napunta ang atensyon sa mga pabor sa maong balaudnon ngadto kang Senador Ralph Recto kinsa naglaraw nga paubsan ang singilon nga buhis sa maong mga produkto tungod kay mogamay na hinuon unya ang makolektang pundo.

Sumala pa sa mga report nga nanggawas ang Bureau of Internal Revenue nga maoy mangolekta sa buhis gibati og kahiubos sa gihimo ni Recto, giingong hasta ang Department of Finance ug Department of Health gibati usab og susamang kahiubos.

( /EIM) (BANAT NEWS)