Responsableng pagpamuhi og hayop gidasig

CEBU, Philippines - Giawhag sa ahensya sa gobiyernong tigpanalipod sa katungod sa mga hayop nga kinahanglang makat-onan sa tawo ang hustong pagpangga sa mga binuhi nilang mga hayop.

Gipasabot ni Dr. Berna Agriam, Regional Animal Welfare Officer atol sa gihimong Association of Government Information Officers (AGIO) ning bag-ohay lang nga ang mga hayop aduna say pagbati sama sa tawo, makamao usab silang masakitan.

Si Dr. Alice Utlang, ang Cebu City Veterinarian mipahinumdom nga ang siyudad sa Sugbo higpit nga mipatuman sa mga lagda sa pagpamuhi og mga hayop.

Matud pa ni Utlang nga kinahanglang panggaon ug tratarong sama sa tawo o sakop sa pamilya ang binuhing mga hayop. Mipasidaan si Utlang nga sama sa iro nga kanunay pasakitan mamahimo kini bangis ug posibleng makapaak ug makasala sa ubang tawo o ba kaha sa mga miyembro sa pamilya sa nagbuhi niini.

Giangkon sa mga beterenaryo nga daghan pa gyud nga mga tawo ang walay tukmang kaalam sa animal welfare  ug hagit kini sa ilang kahugpongan nga mapakatap ug maedukar ang katawhan.  (BANAT NEWS)