Team Khalifa, RKF Iloilo miangkon og luna sa semis

EGS-Solid North wa gihapo'y pilde sa Mayor's Cup

CEBU, Philippines — Ang Team Khalifa sa Tacloban City ug RKF Iloilo miangkon og luna sa semifinals samtang ang EGS-Solid North miinat sa mainit nilang ratsada ngadto sa upat ka duwa sa 1st Mayor Raymond Alvin Garcia Cup Invitational Basketball Tournament 2025 niadtong Martes sa gabii, Enero 28, diha sa Cebu City Sports Institute (CCSI) Gym sa Barangay Sawang Calero.

Sila si Jancork Cabahug ug JZ Dizon mikadlit og 17 puntos matag usa ug si SJ Moore midugang og 15 puntos sa dihang gikastigo sa Khalifa ang Lymar Ballers, 96-68, samtang sila si Jay-r Sumido, Jeckster Apinan, Miles Cañal ug Cedrick Ablaza nagkumboya'g 47 puntos aron pangulohan ang RKF ngadto sa 87-69 nga paglampaso sa Fiesta Gas sa San Carlos City.

Bitbit ang managsamang 3-1 nga baraha, ang Khalifa ug RKF garantisado na og puwesto sa semis ning usa ka semanang torneyo nga nagdalit og P300,000 nga ganting salapi sa makampiyon.

Bisan unsa pay resulta sa ilang sangka samtang sa pagsulat ning taho kagabii, ang Khalifa ug RKF mag-abot og balik sa Final Four sa alas-6 sa gabii karong adlawa (Huybes, Enero 30) diin ang modaog mo-abante sa final.

Sa laing bahin, ang EGS-Solid North segurado nang mobira sa numero unong luna uban ang perpektong 4-0 rekord

human sila mipatigbabaw sa Metro Cars x Stampede, 64-61.

Ang EGS makigsangka batok sa Metro Cars o sa Fiesta Gas sa semis karong alas-4 sa hapon.