Bugnaw sa impeachment
Unsaon man nilang House Speaker Martin Romualdez ug sa iyang mga alyado sa pag-distansiya gikan sa impeachment ni Bise Presidente Sara Duterte pero sa samang higayon dili sila kapasanginlan nga niyaka sa napasaka na nga impeachment complaints?
Kay dili mahimong pakauwawan si Presidente Ferdinand Marcos Jr. nga nideklarar og pagsupak sa impeachment. Pero dili sab mahimong isnabon ang duha ka impeachment complaints. Kay pulos nagbase sa mga ebidensiya nga nahipos sa imbestigasyon sa ilang Committee on Good Government. Sa kuwestiyonableng paggasto ni Duterte sa iyang ?612.5 milyones nga confidential funds.
* * *
Kasaligang mga tinubdan nagbutyag nga likayan nilang public hearings sa Justice Committee, nga igo rang mobalikbalik sa nadunggan nang mga testimoniya, pinaagi sa pag-diretso sa pagpasaka sa articles of impeachment ngadto sa Senado. Nga mahimo lang kon:
• Dunay ipasaka karong semanaha nga ikatulong impeachment complaint nga pirmado na sa 103 ka kongresista (? sa tanang sakop sa House nga dili mga sakop sa Lakas-CMD ni Romualdez) aron nga wala nay botasyon sa plenaryo; ug
• Maka-kolekta ang Makabayan bloc og 103 ka pirma sa mga kongresista sa ilang impeachment complaint.
* * *
Padayong mo-distansiya ang administrasyon sa impeachment ni Duterte kay wala pa silang kaseguro kon makakuha ba sa gikinahanglan nga ? nga mayoriya sa Senado aron ma-konbikto ug mapalagpot si Duterte sa puwesto.
Nanegurong daan nga kon ma-absuwelto si Duterte sa impeachment trial, makabalibad silang Romualdez ug mga alyado nga minoriya ug dili administrasyon ang nagpasiugda pero wala silay kapilian gawas sa pagtuman sa sugo sa 1987 Constitution nga kinahanglang atimanon ang ipasakang impeachment complaints.
* * *
Mahimo ra g’yud nga mopakita ang administrasyon og braso ug daghang kuwarta pagkumbinser sa ilang alyadong mga senador sa pagdason sa impeachment. Pero kon maklaro nang dili niya mahudlat ang Senado mahimo sang mo-resign si Duterte aron nga makadagan pa gihapon sa pagka presidente sa 2028.
Mahimo ra sab nga gamiton ni Romualdez ang tanang lusot sa mga lagda aron nga dili makalihok ang impeachment complaints. Hinunoa, tutokan nila ang paghipos og dugang mga ebidensiya nga makapa-apiki sa mga Duterte. Aron nga kon dili pa mapriso sa International Criminal Court, mapahiyos ang kahigayonan nga makabalik pa sa Malacañang.
- Latest
