MVP kaakibat sa FIVB World hosting

MANILA, Philippines — Patuloy ang pagsuporta ni business tycoon Manny V. Pangilinan (MVP) upang mas lalong umangat ang sports sa bansa.

Kasama na rito ang suportang ibibigay nito para maging matagumpay ang pagdaraos ng prestihiyosong FIVB Volleyball Men World Championship sa Setyembre 12 hanggang 28 sa susunod na taon.

Inihayag ni Pangilinan ang buong suporta nito sa isang meeting na ginanap sa PLDT office sa Makati City kasama sina Philippine National Volleyball Federation (PNVF) president Ramon “Tats” Suzara, MVP Sports Foundation president Al. Panlilio at PLDT Business Transformation Group Head Ricky Vargas.

“Mr. MVP has once again brought the mea­ning of sports patron to a superlative level. With Mr. MVP’s commitment, the Local Organizing Committee [LOC) will be shifting to a higher gear preparations for the world championship which is a little over a year away,” ani Suzara.

Mas lalong tumataas ang kumpiyansa ng Alas Pilipinas na maganda ang inilalaro sa international tournaments.

Kabilang na rito ang dalawang sunod na bronze-medal finish sa Southeast Asia Men’s V.League na ginanap sa Manila at Indonesia.

Sa FIVB MWCH 2025, may 32 matitikas na koponan mula sa iba’t ibang panig ng mundo ang magbabakbakan sa Smart Araneta Coliseum sa Quezon City at Mall of Asia Arena sa Pasay City.

Idaraos ang draw sa Setyembre 14 na susundan ng friendly matches sa pagitan ng dalawang Japanese club teams at Alas Pilipinas Men at Women squads sa Setyembre 7 at 8 na gaganapin sa PhilSports Arena sa Pasig City.

Kasama si Pangilinan sa FIVB MWCH LOC Board na co-chaired nina Presidential son William Vincent “Vinny” Araneta Marcos, Senator Alan Peter Cayetano at Department of Tourism Secretary Christina Garcia Frasco.

Nasa LOC Board din sina Senator Pia Cayetano, Philippine Olympic Committee president Abraham “Bambol” Tolentino at Philippine Sports Commission chairman Richard Bachmann.