Tulfo, Abalos tandem sa pagbibigay kaligtasan at hustisya sa publiko
MANILA, Philippines — Nagsanib-puwersa ang dalawa sa mga kilalang personalidad sa serbisyo publiko na sina brodkaster Erwin Tulfo at Atty. Benhur Abalos Jr., na tinaguriang “Kakampi ng Inaapi” upang isulong ang adbokasiya para sa kaligtasan at hustisya sa Senado.
“Sa Senado, kaligtasan at hustisya ang aming misyon,” pahayag ni Tulfo, isang beteranong mamamahayag na kilala sa kanyang walang-takot na paninindigan laban sa katiwalian at pang-aabuso.
Kasama niya si Abalos, dating kalihim ng Department of the Interior and Local Government (DILG), na nagbigay-diin sa kahalagahan ng pananagutan sa batas.
“Kung may kasalanan, dapat managot sa batas,” ani Abalos na isang abogado at nagsilbing alkalde ng Mandaluyong City sa loob ng 15 taon.
Sa ilalim ng kanyang liderato, naging matagumpay ang mga barangay-based anti-drug campaigns, pagpapalakas ng kapayapaan at kaayusan sa mga komunidad, at pagsugpo sa mga sindikato ng droga.
Nanawagan si Tulfo para sa epektibong mga solusyon na walang kinikilingan. Habang binigyang-diin naman ni Abalos ang kahalagahan ng sama-samang pagkilos para makamit ang tunay na hustisya.
Sa kaniyang termino bilang DILG secretary, napahuli at napakulong niya ang high-profile na mga personalidad, kabilang sina Pastor Apollo Quiboloy, Alice Guo, at ang serial rapist na si Teddy Jay Mejia, matapos silang magtago sa kamay ng batas.
Ang Tulfo-Abalos tandem sa Senado ay naninindigan sa kanilang hangaring gawing prayoridad ang kaligtasan ng bawat Pilipino at tiyakin ang pantay na hustisya para sa lahat.
- Latest
