‘ATM’ post sa social media iwasan ngayong holiday season — PNP

MANILA, Philippines — Pinayuhan ng Philippine National Police (PNP) ang publiko na iwasan ang pagpopost ng ‘ATM’ o at the moment sa social media ngayong Holiday Season upang maiwasang ma­ging biktima ng mga akyat bahay sakaling magbabakasyon.

Sa isinagawang press briefing, sinabi ni PNP Public Information Office chief PBGen. Jean Fajardo na kailangan na maging maingat ang publiko ngayong Kapaskuhan kung saan umaatake ang mga kawatan.

Ani Fajardo, marami ang magbabakasyon at ipagdiriwang ang Pasko kaya dapat na siguraduhin ng publiko na may sapat na ilaw at maging ng CCTV ang kanilang bahay.

Nabatid din kay ­Fajardo na nakikipag-ugnayan naman ang PNP sa mga barangay na magsasagawa ng pag-iikot sa kanilang nasasakupan.

Samantala, pinaalalahan din ni Fajardo ang mga motorista na siguraduhin na nasa maayos na kondisyon ang kanilang mga sasakyan bago bumiyahe.

Tiyakin na may sapat na tulog at hindi nakai­nom para iwas disgrasya.