12 ‘wagi’ sa 2025 senatorial race, inilatag ng Tangere
MANILA, Philippines — Inilatag ng Tangere survey na isinagawa mula Hunyo 11 hanggang 15 ang listahan ng 12 potensyal na kandidato na posibleng magwagi sa karera sa pagkasenador sa darating na 2025 midterm elections.
Si ACT-CIS Party-list Rep. Erwin T. Tulfo, frontrunner sa survey na may score na 57 percent, ang nanguna sa grupo ng mga potensyal na kandidatong pinili ng mga respondent para okupahin ang 12 senatorial seats na mababakante sa 2025.
Pumangalawa sa pinapaborang potensyal na kandidato sa pagkasenador ay si dating Pangulong Rodrigo R. Duterte, may 50.83 porsyento, at ang kanyang dating aide at incumbent na si Senador Bong Go ay sumunod na may 47.08 porsyentong marka.
Si dating Senador Tito Sotto ang pang-apat, may 43.75 porsiyento, at si incumbent Sen. Pia Cayetano sa ika-5 puwesto, 41.25%.
Si TV at radio personality Ben Tulfo, kapatid ng nangungunang si Erwin ang umokupa sa ika-6 na puwesto, 40.83%, Sen. Lito Lapid (40.08%), at Presidential sister Sen. Imee Marcos nasa ika-8.
Lumapag sa ika-siyam na puwesto si boxing champ at dating senador Manny Pacquiao (37.50%), Francisco “Isko Moreno” Domagoso (35.42%), sa ika-10 puwesto.
Si dating Senador Ping Lacson na may 35 porsiyento ay nasa ika-11, at si Sen. Francis “Tol” Tolentino, na may 34.17 porsiyento, ang kumumpleto sa tinatawag na ‘Magic 12’ para sa 2025 senatorial race.
- Latest
