Pangulo sa RPOC Visayas magtagbo

CEBU, Philippines - Gikatakdang magtigum ang mga chairman ug vice chairman sa Visayan Cluster sa Regional Peace and Order Council (RPOC) karong Biyernes sa Iloilo City alang sa mga plano batok sa kriminalidad ilabi na sa ginadiling drugas.

Niadtong Pebrero 15 nadawat na ni Gobernador Hilario Davide III ang iyang appointment gikan sa Malacañang isip chairman sa RPOC-7.

Gibutyag ni Davide nga ang Department of Interior and Local Government maoy nipatawag kanila sa maong tigum.

Ang motambong sa maong tigum langkuban sa mga chairman ug vice chairman sa RPOC sa Rehiyon 6, 7 ug 8.

Gibutyag ni Davide nga nangayo siya og tabang sa hepe sa Police Regional Office (PRO)-7, Senior Superintendent Noli Taliño, kabahin sa iyang presentasyon ngadto sa ilang meeting.

Human sa maong tigum si Davide gikatakdang makigsabot kang Taliño sa pagpahigayon nila sa unang RPOC-7 meeting niining tuiga karong Marso. (BANAT NEWS)