‘BuhayLespu’ FB page ipabadlong

CEBU, Philippines - Nakakuha og nagkadaiyang reaksiyon ang trending pictures sa grupo sa mga force multipliers sa social networking site nga Facebook kinsa nagpa-polis-polis ug naka-uniporme og polis ug duna pay bitbit nga mga high-powered firearms.

Ang maong hulagway gi-post sa Facebook page nga “BuhayLespu” ug nakaangkon kini og nagkalain-laing komento gikan sa mga sakop sa Philippine National Police ug mga sibilyan.

Nakaabot ang maong taho kang Konsehal Dave Tumulak kinsa maoy deputy mayor on police matters ug kini niingon nga samtang daku og tabang ang force multipliers sa pagmintinar sa kahapsay ug kalinaw apan angayan lang sab silang pahinumduman sa mga angay ug dili angay buhaton.

Matud sa konsehal nga ang paggamit nila og PNP badge dili makiangayon basin og makahatag kini og bati nga imahe sa kapolisan.

Tungod sa maong insidente gihimug-atan ni Tumulak nga kinahanglan gyud i-superbisar sa kapolisan ang grupo aron mabadlong sanglit nigamit sila sa uniporme sa polis nga gidili gyud sa balaud ilabi na kung dili sakop sa bisan unsang law enforcement agency.

Kinahanglan sab sila badlungon sa higher authorities aron maklaro nga sila civilian volunteers lang ug dili mahimong magdala og armas ilabi na kung walay lisensiya.

Makig-alayon usab sila sa kapolisan kung duna silay mga lakaw nga himoon ug dili kay magbuot-buot lang, dugang sa konsehal. (/GMR)  (BANAT NEWS)