Subic mayor pumalag sa isyu ng police power
Ipinakita ni Mayor Khonghun ang plake ng pagkilala ni PNP Chief Dela Rosa bilang top 1 implementator ang bayan ng Subic laban sa drug trade noong Oktubre 2016. Alex Galang
MANILA, Philippines — Naniniwala si Subic Mayor Jefferson Khonghun na may bahid pulitika ang pagkakadawit ng kanyang pangalan kaugnay sa hindi masugpo ang drug trade sa nasabing bayan kaya isa siya sa inalisan ng police power ng National Police Commission (Napolcom) dahil nalalapit na naman umano ang eleksyon 2019.
Si Mayor Khonghun, kasama ang 20 alkalde at isang gobernador ang inalisan ng police power ng Department of Interior and Local Government (DILG) sa rekomendasyon ng Napolcom.
“I know myself, and people of my town knows me and even you the local media must have known me in my seven years as town mayor and my previous experience as provincial board member of Zambales,” pahayag ni Mayor Khonghun.
Ayon sa alkalde, kailangan umano ng Napolcom na masusing suriin at maire-validate ang mga ulat na wala siyang programa laban sa drug trade dahil nagmumukha lamang umano itong akusasyon na walang basehan.
Naniniwala rin ang nasabing alklade na nagsimula ang akusasyon laban sa kanya nang mag-umpisang mapag-usapan ng mga taga Zambales ang posibilidad na pagtakbo nito bilang gobernador ng lalawigan.
Nabatid na binigyang parangal mismo ni Philippine National Police Chief Director Gen. Ronald “Bato” Dela Rosa ang Subic Police Station bilang top 1 implementator sa Anti-Illegal Drugs Campaign “Double Barrel-Alpha” sa ilalim ng MPS-Class B level sa central Luzon noong Oktubre 2016.
Base sa liham ng Napolcom na ipinadala kay Mayor Khonghun, bilang isa sa mga local government executives na binanggit sa ulat, inaalis sa kanya ang police power dahil umano sa bigong masawata ang drug trade sa kanyang lugar at maging ang abuse of authority.
Gagawa umano sila ng mabilisang hakbang upang matanggal sa listahan ang kanyang pangalan na tila hindi umano dumaan sa masusing beripikasyon.
- Latest
