Polis apil sa manakop sa pataka og panigarilyo

CEBU, Philippines - Ang bag-ong director sa Police Regional Office-7, Chief Supt. Jose Mario Espino mibutyag nga igo ra silang modakop sa mga makalapas sa Smoking Ban isip pagsanong sa Executive Order No. 26 ni Presidente Rodrigo Duterte nga epektibong gipatuman kagahapon.

Apan ang Local Government Units na ang bahala mobutang sa mga designated Smoking Areas.

Samtang ang tigpamaba sa Cebu City Police Office nga si Police Chief Inspector Ramoncelio Sawan miingon nga wala pa sila’y nadakpang milapas sa maong ban kagahapon.

Apan sa CCPO, si Senior Superintendent Joel Doria mimando nga magbutang pud og smoking area sa kampo isip pagtuman sa executive order.

Kung dunay masakpang pulis nga makalapas sa maong executive order matud pa ni Sawan nga dili sila makalingkawas sa penalty niini.

“Tanang police nga naa sa dalan can implement it…Kung si pulis naay makita nga nag-violate, mahimo niyang dakpon ang maong tawo,” matud pa niya. Ang Smoking Ban nagmando sa tanang establisamento nga magbutang og designated smoking areas (DSAs) ug gisugyot nga mas maayong ibutang kini sa gawas sa ilang establisamento kay gamay ra og rekisitos.

Apan ang mga local government units (LGUs) maoy gitahasan sa higpit nga pagpatuman niini.

Ang masakpang nanigarilyo sa dili DSAs pamultahon og P500 hangtud P10,000 depende kon makapila na kini nasakpan. Samtang ang mga tag-iya og mga establisamento  pamultahon og P5,000 o pagkapriso og dili molapas 30 ka adlaw.

Hugot nga gidili ang pagbaligya og sigarilyo duol sa mga eskuylahan ug mga dapit nga duwaanan sa mga bata. (BANAT NEWS)