Nietes nagsugod na’g ensayo
CEBU, Philippines - Bisan og wala pa mahingpit ang gikatakda niyang title fight, si two-division world champion Donnie ‘Ahas’ sa ALA Boxing Gym nagsugod na sa iyang ensayo.
Padayon pa karon nga gihikay ang gimando nga IBF flyweight championship bout tali nilang Nietes ug Thai No. 4 contender Eaktawan Krungthepthonburi, apan ang garbo sa Murcia, Negros Occidental mipahigayon na dayon sa subsob niyang pagbansay-bansay pagtimaan nga seryoso siya sa iyang misyon nga mamahimong usa ka three-division world champion.
Bakante karon ang IBF 112-pound title human ang kababayan ni Nietes nga si Johnriel Casimero boluntaryong mihubo sa iyang bakus aron hagiton ang wa’y pildeng Nicaraguan super flyweight champion ug pound-for-pound king nga si Roman ‘Chocolatito’ Gonzalez.
Ang 34-anyos nga si Nietes nga naghupot sa titulo isip longest reigning Filipino world boxing champion, nag-malampuson sa iyang flyweight debut diin iyang gipilde pinaagi sa unanimous decision si kanhi world champion Edgar Sosa sa Mexico niadtong Septiyembre sa miaging tuig didto sa StubHub Center sa Carson, California.
Sa wala pa mokampanya sa flyweight, si Nietes kanhi naghari isip WBO minimumweight ug WBO light flyweight champion. (BANAT NEWS)
- Latest
