Ang tinood nga Jolina Magdangal

Si Jolina Magdangal usa sa labing inila ug gitamod nga artista sa atong panahon. Gisunod sa kadaghanan labi na ang mga kabatan-onan kansang lihok gibantayan ug kansang estilo gisumban. Sa laktod nga pagkasulti modelo sa kadaghanan hinungdan nga siya maoy gikuha sa Malacañang aron pagdumala sa usa ka programa kalabot sa mga kalihukan ni Presidente Gloria Macapagal Arroyo.

Dako siya nga artista sa atong henerasyon apan nindot nga palandungon nga ang sama kaniya labihan gihapon ka maabi-abihon ngadto sa mga sakop sa media. Duyog sa iyang mga buhakhak si Jolina malampuson nga mikulit og imahe isip tinood nga tawo kansang ka sikat wala musaka sa iyang ulo. Kini gumikan kay sa iyang pakighimamat sa mga sakop sa Cebu press niadtong nakalabay nga semana didto sa SM Cebu conference room wala siyay duha duha nga mitubag sa tanang pangutana.

Sa pangidaron nga baynte syete anyos giklaro ni Jolens nga wala pa siyay plano nga magpahigot sa kaminyuan uban sa iyang hinigugma nga si Atty. Bebong Muñoz. Tinood lima na sila ka tuig nga dunay relasyon apan matud ni Jolens buot una niya nga masinati ang tinood nga kahulugan sa relasyon diin magdate ug magkuyog sa hapit tanang higayon. Kini tungod kay long distance relationship ang ila ni Bebong tungod kay tua nagbase sa Estados Unidos ang naulahi. Apan iyang giklaro nga si Bebong gyud ang lalake nga iyang buthuan unya didto sa altar sa kaminyoon pag-abot sa tukmang panahon.

Ang sikat nga TV host nga si Kuya Boy Abunda maoy naghimo sa dalan aron magkatagbo siya ug ang abogado. Typical ang sinugdanan diin nag-una sila sa pagpinadad-anay og text messages hangtud nga mag-istorya na sila sa telepono. Matud ni Jolina nga sa telepono pa lang gibati na niya nga si Bebong ang lalake nga buot niyang mahimong hinigugma sanglit ang naulahi usa ka tinood nga tawo diin dili sama sa uban nga ulog-ulogan siya sanglit usa siya ka artista. "Sa phone pa lang ang gaan. Kasi hindi ka binobola totoong tao siya kausap," ni Jolens pa nga midugang nga sa unang kita nila ni Bebong ang mga pulong nga unang nigawas sa iyang baba mao ang " Ang tangkad naman nito." Dinhi ning higayona miagik-ik siya dungan sa pag-angkon nga 5 flat lang siya samtang si Bebong 6"1.

Gikan sa pagka-child star courtesy of " Ang TV" sa ABS-CBN kaniadto si Jolina midako ngadto sa pagkahimong Teenage Fashion Icon of Philippine show business, Movie Theme Song and Soundtrack Queen, Commercial Princess (si Sharon Cuneta ang reyna) ug ning bag-o lang Princess of the Heart, human siya nahimong love adviser sa pelikulang "Lovestruck." Gikan sa mga pelikula nga gihugopan og maayo sa mga fans sa Jolina-Marvin Agustin loveteam, ang aktres hinay-hinay na mga misulod sa kalibutan sa news and public affairs isip usa sa mga main hosts sa Unang Hirit matag buntag sa GMA-7. Sa gabii maaninaw usab siya isip host sa Starstruck batch three.

"Iba naman yong mundo ko sa Unang hirit. Medyo nahirapan lang akong magising ng maaga pero ang ganda ng feeling. Current events na yon eh, at least hindi puro tsismis lang," matud pa niya. Miingon si Jolina nga nagsugod siya isip guest lang sa maong show niadtong Hulyo sa nakalabay nga tuig hangtud nga nimata nalang siya nga siya na maoy gipakanta sa theme song ug regular host na.

First love ni Jolina ang serbisyo publiko gani miingon siya nga andam gyud siya nga motabang sa mga nagkinahanglan kutob sa iyang mahimo. "Masaya ako kapag mga public service programs. Willing ako na tumulong sa mga ganon kahit hindi pa nila I video."

Kontento na si Jolina sa dagan sa iyang career karon diin gawas nga host siya sa duha ka shows sa GMA-7 padayon usab siya nga nagkutlo og dugang kahibaw pinaagi sa iyang show nga "The Working President." Dinhi matud ni Jolina mga dagkong tawo sa kalibutan sa politika ang iyang mahibalag matag karon ug unya kinsa mahimo niyang makuhaan og kahibawo nga sarang niyang ikapaambit ngadto sa mga batan-on alang usab sa kaayuhan sa tanan.

Sanglit ganahan siya nga moserbisyo sa publiko wala malikayi ang pangutana kon duna ba siyay laraw nga mosalmot sa politika ugma damlag. " Ayaw kong magsalita ng patapos." Kini maoy tubag ni Jolens dungan sa pagtataw nga karong mga panahona wala pa gyud mosantop sa iyang huna-huna ang maong posibilidad.

Sa pagkatkat niya sa hagdanan sa kalampusan daghan ang mga pagsaway nga iyang nadawat. Christmas tree, Kikay, aroray ug bisan unsa na lang ang giangga ngadto kang Jolina apan matud pa niya wala kini niya igsapayan. "Wala akong pakialam. At least nakapag marka ako na crazy ako. Ini-enjoy ko lang talaga pero yung iba hindi natutuwa wala akong pakialam. Marami naman yong mga bata na natutuwa sa akin."

Kataw-anan nga huna-hunaon nga ang usa ka Jolina Magdangal mauwawon diay sa tinood nga kinabuhi. Kini matud pa niya ang hinungdan nganong perte niyang tabiana sa ingon dili matingob ang atensyon sa mga tawo ngadto niya sanglit maminaw naman sila niya inay bantayan ang iyang lihok ug hitsura. Apan ang sekreto nganong abtik siya kanunay mao nga " the more na may tao, the more na na-energize ako.