Gum-os na ang gihay ni Gualda

Wala nay makapuhal pa kang Inday Gualda kun ang kaguwapa maoy hisgotan. Lawas pay imo nga lumoy kaayo ug makapanglad-ok gyud gani ang usa ka lalaki nga magtutok sa iyang lawas.

Ang iyang amahan nga Nikol, usa ka mestiso Aleman, ug ang iyang inahan nga si Megan usa ka mestisa Amerikano, maong nindot gyud ang resulta sa ilang anak.

Dinhi sa sityo Lunod-Gapnod, sila si Inday Gualda ang giilang tubig-tubigan ug sila pud ang dagananan sa mga silingan nga maproblema sa kuwarta o kun adunay mamatay.

Dili dawo si Nikol ug ingon man ang iyang asawa nga si Megan ug kutob sa moanha aron mangayo’g tabang, makadala gyud sa ilang tuyo.

Apan luyo sa ilang kaayo may usa ka tawo dinhi sa ilang sityo nga adunay kaaligutgot sa magtiayon -- kini mao si Agustino.

Gusto kini nga manimawos kang Nikol, ang tawo nga nakaingon sa kamatayon sa iyang inahan nga si Amelda. Nakita gyud niya usa kadto ka gabii nga giyak-an ug gipaak ni Nikol ang liog sa iyang inahan ug gisuyopan sa dugo.

Ungo si Nikol, mao kini ang hilom nga hinungdan ngano nga nagdumot siya sa maong pamilya. Wala gyu’y nahibawo dinhi sa tibuok sityo bahin sa pagka-mangtas nila ni Nikol ug Megan.

“Ikaw ba si Inday Gualda?” ni Agustino pa ngadto sa dalaga. Guwapo usab kini si Agustino nga mura gyud og usa ka artista sa pelikula ang iyang bayhon.

Nagkasuod sila ug misangko sa pagminahalay. Tungod sa gugma gitugyan ni Inday Gualda ang iyang lawas ngadto kang Agustino. Dayon wala na magpakita si Agustino. Iya lang gipahimuslan.

Unya usa ka gabii, samtang naglakaw si Agustino sa usa ka mingaw’ng lugar, kalit lang may miatang kaniya nga babaye, si Inday Gualda. Kalkag na ang buhok ni Inday Gualda. Usa na siya ka wakwak. Niya pa, “Agustino, mahal ko ikaw, ug ikaw ang tag-iya ning akong gisabak, busa, ayaw tawon ko’g palay-i, mahal ko ikaw.”

Ug milupad dayon si Inday Gualda. Naglagot si Agustino sa iyang nakita apan takulahaw nga naluoy siya kay mabdos na man diay si Inday Gualda ug siya ang tag-iya sa iyang gisabak.

Pagka-ugma miadto si Agustino sa balay nilang Inday Gualda ug didto na kini mopuyo. (Kataposan)