Gullas: Bar exam di ma-regionalize

CEBU, Philippines - Nagtuo si Talisay City Mayor Eduardo Gullas nga dili gyud ma-regionalize ang Bar exam.

Kini human iyang nakita nga hugot gyud ang baruganan sa mga justices sa Supreme Court (SC) nga sa kaulohan lang himuon ang eksaminasyon.

Si Gullas nga usa sab ka abogado niingon nga mas maayo nga regionalize ang Bar exam aron makadaginot ang mga tinun-an sa abogasiya sa ilang gasto.

Gani sa dihang naa pa siya sa Kongreso siya mismo ang nag-una sa paglihok nga ma-regionalize ang Bar exam.

Apan kadaghan na sab siya nga napakyas tungod sa baruganan sa mga justices nga dili pabor sa iyang laraw.

“Lahi gyud ang perception sa public sa Bar exams. Everyone watches the Bar exams,” matud niya.

Asoy pa niya nga kapila na nila gilihok ang maong laraw apan pirme silang pakyas bisan pa man nga daghan sa mga mokuha sa Bar taga Visayas ug Mindanao. (Gabriel C. Bonjoc/GMR)

5-year validity sa

lisensiya himoong balaud

Gihangop sa transport groups sa Sugbo ang lakang sa komitiba sa transportasyon sa Kongreso sa paglugway sa validity sa drivers’ licenses gikan tulo ngadto sa lima ka tuig.

Ang maong lakang nagtinguha usab nga dili na maglinya og taas ang mga aplikante sa driver’s license sa mga buhatan sa Land Transportation Office sa nasud.

Matud sa transport groups sa Sugbo nga maayo kini nga lakang.

“Okay ra na namo kay para taas-taas ang panahon pagtigum sa pinansyal para sa renewal,” matud ni Metudio Belarmino, ang consultant sa Ang Nagkahiusang Draybers Alang sa Reporma.

Si LTO-7 Director Alita Pulga nagkanayon nga ang five-year validity giimplementar na sa LTO niadto pang Nobiyembre 2, 2016 apan mas maayo nga mahimo na kining balaud kay sa pagkakaron usa lang kini ka Administrative Order Number 2016-34 nga giluwatan sa Department of Transportation.

Buot sab sa maong komitiba nga mamubo ang transaksiyon sa pagkuha og driver’s license aron sa pagtubag sa mga reklamo sa pagkuwang og plastic cards ug sa legal nga isyu nga may kalambigitan sa card procurement. (BANAT NEWS)