Cocolife beach volleybelles nagpasiklab sa PSL opening

MANILA, Philippines - Nakapaglista ng buwenamanong panalo sa Pool B ng women’s bracket ang Cocolife matapos igupo ang F2 Logistics A 15-21, 21-18, 17-15 sa 2017 Belo Philippine Superliga (PSL) Beach Volleyball Challenge Cup sa Sands SM By The Bay sa SM Mall of Asia sa Pasay na nagsimula kahapon.

Dinala ni Wensh Tiu ang kanilang tambalan ni Aby Nuval upang makumpleto ang kanilang come-from-behind na panalo sa kanilang unang laro.

Ayon kay Tiu, nakatulong ang kanyang pagiging pamilyar sa kanyang kalaban na si Cyd Demecillo na kanyang kakampi noon sa De La Salle University.

“I’m quite familiar with her so nakatulong ‘yun,” pahayag ni Tiu na naging katambal ni Demecillo sa UAAP Beach Volleyball tournament. “Tatlong beses lang kaming nag-training bago magsimula ‘yung tournament, tsaka meron din kaming tune-up kalaban sila (F2 Logistics). “Actually, may chance kaming mag-dominate kaya lang marami kaming errors nung first set.”

Ipinunto rin ni Tiu ang kanilang mga pagkakamali sa unang set, kaya’t kinailangan nilang bumawi upang manalo.

Nangangailangan na lamang ng isa pang panalo sina Tiu at Nuval para makausad sa quarterfinals ng torneo na matatapos sa Mayo 7 sa Linggo.

Sa iba pang laro, nanaig ang pares nina Marijo Medalla at Bianca Tripolo ng Perpetual Help 21-19, 21-16 kina Kath Arado at Rosalie Pepito ng Generika-Ayala B upang makasungkit ng panalo sa Pool A.

Sa men’s bracket, tinalo ng IEM A na binubuo nina Arjay Saledo at Romnick Samson ang Wayuk na kinakatawan nina Emmanuel Gamat at Conrad Cabrera, 21-13, 21-12 habang iginupo naman ng tambalang Mike Abria at Edwin Tolentino ng SM By The Bay  sina Michael Zamora at Carlito Delito ng IEM B, 21-15, 21-16 na kanilang sinundan ng 21-12, 21-11 na panalo laban sa TVM at pinadapa naman ng kombinasyon nina Erickson Ramos at Edmar Bonono para sa Cignal HD ang Perpetual Help B nina Jayjay Solamilio at Gilbert Balmores, 21-10, 21-19.

Muli namang natalo ang Wayuk ng Generika-Ayala, 21-12, 21-12 na kanila ring sinundan ng isa pang panalo kontra sa IEM A, 21-7, 21-7 habang nakabawi naman ang Perpetual Help B nang talunin ang IEM A. 21-19, 21-17 at pinataob naman ng magkapatid na Rey at Relan Taneo ng Perpetual Help A ang  IEM B, 21-17, 21-13. - FML