Mga sekreto aron molampos (2)

Sa atong isyu kagahapon, gituki nato ang kabahin sa balaod sa kinaiyahan, ilabi na ang mahitungod sa atraksyon. Kinahanglang pulos mga maayong ideya ang atong ipukos sa kaugalingon, maingon man usab ngadto sa isigkatawo, aron dugokon ta nga mopilit kanato ang mga maayong oportunidad.

Sa sama nga sitwasyon, daghan sab nga tentasyon ang moapil pagdugok aron danihon ta sa kalibog nga maoy mga babag o pagsulay. Busa, iseguro ang atraksyon nga kita molampos.

* Totho (tithe) o paggahin — Sa hubad sa relihiyoso nga pundok, ang 10% sa kinitaan igahin sa dili pa kini hilabtan sa ubang panginahanglan. Sa natural nga hubad sa kinaiyahan, nga dili kini iagad sa kantidad sa kita, importante nga makakat-on kita sa kabililhon sa pagtigum, bisa’g molabaw pa’s 10%.

Sa ingon, may magamit ta nga masustinehan gyud nga molampos sa pangandoy.

* Mapilo sa makadaghan — Pagbuot kini sa kinaiyahan nga sublion ug pil-on sa makadaghan nga beses ang unsa may mga angay buhaton, nga mas labing masingkamuton sa pakigbisog. Aron sab mapilo sa makadaghan ang kaseguroan nga kita tataw nga labing magmauswagon sa kinabuhi. Dili ipamasin ang pagduhaduha sa pagtuo, kay basi’g mapilo kita sa kadaghang beses sa mga kompromiso sa kalibogan nga makababag sa kalampusan.

* Katugbangan — Ang tanang butang sa kinaiyahan aduna kini katugbang. Gihimo kini aron kita mohaom nga molig-on ang kaugalingon, diha sa disisyon sa mga maayong ideya nga buot buhaton.

Makakat-on kita sa pagbalanse nga ang katugbang sa mga maayo, mao ang kalampusan sa mga pangandoy, nga maantigo sab kita motimbang sa kagul-anan nga mabuhi sa kalipay.

Niini nagpasabot nga dili na kita malibog pa, nga ang pag-angkon sa kalampusan, gikinahanglang moagi gayud kita og daghan nga kapakyasan.