Angay ba nga i-postpone?

Dako ang tsansa nga mauktaba na usab ang piniliay sa barangay ug Sangguniang Kabataan nga gikatakda unta nga ipahigayon karong Oktubre 23. Kini kun mosanong gayud ang duha ka sanga sa Kongreso sa panawagan ni Presidente Rodrigo Duterte.

Gusto ni Duterte nga i-postpone ang eleksiyon kay nahadlok siyang  mointra unya kadtong mga nalambigit sa negosyo sa gidiling druga. Daan na nga gibutyag sa presidente nga mayoridad sa mga barangay opisyal sa nasud ang nalambigit sa druga.

Kini ang hinungdan ngano nga gusto niya nga i-appoint na lang ang mga bag-ong opisyal sa kabarangayan. Rason niya nga kun madayon gayud ang eleksiyon sa barangay karong Oktubre, molihok gayud ang salapi sa mga sindikato sa druga aron pagsiguro sa kadaogan sa ilang nga kandidato.

Apan daghan ang mirebenta sa sugyot ni Duterte. Makalapas kuno sa balaod ang pagtudlo og mga barangay officials. Hinuon wala pa sukad kini mahitabo sa kasaysayan sa Pilipinas ilawom sa kasamtangan nato nga Konstitusyon.

Hinuon dako ang tsansa nga matuman kining maong sugyot sa presidente. Kini kun mosunod gayud ang Kongreso sa iyang gusto ug mopanday og balaud paghatag kaniya og gahum pagtudlo sa mga bag-o nga opisyal sa barangay.

Apan alang kanako, mas labing maayo kun idayon gayud sa kagamhanan ang piniliay sa barangay karong tuiga. Ilawom sa demokratiko nga panggobiyerno, angay lang nga ihatag ngadto sa katawhan ang mandato pagpili sa ilang mga lider sa barangay.

Kun gusto sa kagamhanan nga mawala na sa hingpit kadtong mga opisyal sa barangay kinsa nalambigit sa druga, nganong dili man higpitan sa gobiyerno ang umaabot nga piniliay aron nga dili gayud matuboy sa puwesto kadtong mga bugok nga kandidato?

Kaya gayud kini sa kagamhanan, ilabina niining panahon sa gipahugtan nga kampanya batok sa druga. Gikinahanglan lang ang tinud-anay nga pag-edukar sa katawhan mahitungod sa tukma nga pagpili niadtong mga ligdong ug angayan nga mga kandidato.