EDITORYAL - Imoralidad?

Gipistahan karon sa mga netizens kining isyu kabahin sa pagbandilyo ni House Speaker Pantaleon Alvarez nga aduna siya’y relasyon sa usa ka babayeng minyo ug dunay mga anak. Hinoon, bisan gani ang iyang agalon nga si Presidente Duterte miangkon man ug wa molimod nga duna siya’y karelasyon karon, kay dugay naman siyang buwag sa asawa.

Daghan ang misaway ni Alvarez kay daw iyang gipasabot nga tanang mga bana sa kalibutan aduna gyu’y kabit o karelasyon gawas sa ilang mga asawa. Dili ba kaha ang iyang gipasabot kadto lang mga kauban niya sa Ubos Balay Balauranan?

Kun mao na, pulos diay imoral ug makakasala ang tanang kapin 100 ka lalaking kongresista sa nasud? Kakiwaw pud paminawon nga sila nga mopanday ug mobotar paghimo og mga balaod sa pagsagrado sa pamilya, proteksyon sa kababayen-an ug sa ilang mga anak, nag-promote man diay sa pagpangabuso ug imoralidad.

Kakuyaw kun ma-pressure ni si Alvarez, dili ba kaha ni siya motug-an kun kinsa sa iyang mga kauban sa Kongreso ang dunay mga kabit? Unsa kahay ikasulti sa mga babaye nga magbabalaod bahin niini? Dinhi sa Pilipinas, gipangusgan gyud ang women empowerment ug paghatag og patas nga pagtagad sa  mga babaye, sama sa mga lalaki.

Apan sa kultura sa mga Pilipino nga dominante kaayo ang kalalakin-an nga usahay bisan sayop nga buhat sa lalaki batok sa kababayen-an palabyon lang. Dihang gilutos si Senador Leila De Lima, usa gigamit batok kaniya ang iyang pakigrelasyon sa iyang drayber.

Gitawag pa gani kadto nila nga imoralidad ug dili maayong buhaton sa usa ka opisyal sa gobiyerno. Apan ang dakong kalainan kay babaye si De Lima, samtang lalaki si Alvarez. Kun dili pareho og reaksyon ang mga tawo sa duha ka opisyal nga gikan sa magkaatbang nga partido politikal, makaingon ta nga basin tungod kay kaalyado kini ni Duterte, o basin hangtod karon wa pa gihapo’y buot ang mga tawo, mao nga bayas lang gihapon sila ngadto sa nga babaye.