Detention cell sa Talisay naghuot

CEBU, Philippines - Tungod sa sunod-sunod nga pagpangronda sa kapolisan batok sa ilegal nga sugal ug drugas, naghuot na ang prisohan sa Talisay City Police Station nga anaa sa City Hall.

Si PSupt. Emerson Dante, hepe sa kapolisan sa Dakbayan sa Talisay nibutyag nga ang direktiba diha kanila mao ang pagsige og sikop niadtong mga tawo nga nalambigit sa ginadiling drugas ug sugal. Ang problema sa kahuot sa prisohan dili na nila matagad kay nisiguro man sila sa ilang trabaho ug makalikay sa pinatyanay.

“Wala talaga kami’ng magagawa. Consequences na yan sa mga taong mahuhuli,” nagkanayon si Dante.

Dugang niya nga angay totukan ang problema sa prisohan sa ubang mga ahensya sa gobyerno lakip na ang Commission on Human Rights nga maoy kritikal kaayo diha kanila.

Naobserbahan sa Banat News nga ang ubang mga piniriso nga padung na nga mopyansa, pagawson ug ibutang sa gawas samtang nagpaabot nga makabayad na gyud sa pyansa. Gani ini’g sulod pa lang sa ilang lawak, sugaton kana og init ug baho sa tawo.

Subay niini si Dante niingon nga ang iyang mga sakop na nga nadestino sa prisohan maoy iyang pabut-on sa pagdumala apan iya kini’ng gipahimangnuan nga magbinantayon sa mga priso aron dili sila mapugahan. - /DILT) (BANAT NEWS)