Mayor nagplanong mokiha batok pari

CEBU, Philippines - Dul-an 300  ka mga magtutuo sa Santo Niño Roman Catholic Parish sa Lungsod sa Santa Fe ang niapil sa gipahigayon nga prayer rally kagahapon sa kaadlawon nga gipangulohan ni Fr. Roy Bucag, tungod sa ilang pagsupak sa Isla Music Festival, Food and Fashion nga ipahigayon karong April 12-15.

Apan nagplano karon ang mayor sa posibleng pagsang-at og reklamo batok sa gihimo sa pari tungod sa daghang kalapasan atol sa pagpahigayon niini.

Bitbit ang mga tarpaulins nga nagsupak sa maong kalihukan gilibot nila ang Barangay Poblacion sa maong lungsod ug gisunod dayon ang Santos nga Misa. Matud niya, base sa gidaghanon sa nanambong nagtuo siyang daghan gyud ang dili gusto sa maong kalingawan.

Sumala pa ni Bucag, dili kini haom ang maong kalihukan sa Semana Santa nga panahon sa pagpamalandong sa mga Kristiyano ug salikwaot kaayo tan-awon sa mga kabatan-onan.

Samtang si Fr. Mars Carabio, parish priest sa Iglesia Filipina Independente nibutyag wala siya’y pagsupak kung ang kalihukan sa isla makapalambo sa pagtuo sa katawhan ngadto sa Ginoo apan mas gusto niyang ang espirituhanong kalihokan sa Semana Santa ang dayuhon sa mga dumuduong. Matud niya di na kini angay lalison pa ug isipon na lang kini nga kakuhaan ug pagtulon-an aron sa sunod tuig dili mausab ang dili angay buhaton.

Si Farrel Sanchez, ang marketing sa Isla Music Festival nitug-an nga wala sila’y mga kalihukan  sa higayon adunay mga activity sa simbahan tungod kay aduna sila’y respeto ug magtutuo usab sila sa katoliko.

Si Mayor Jose Esgana sa Lungsod sa Santa Fe niklaro nga gitahod nila ang mga kalihukan sa simbahan apan dili mahimo nga pugngan ang turismo tungod kay ang tawo wala mabuhi sa sige og simba lang.

Sumala pa ni Esgana, angayan basahon ni Fr. Bucag ang berso sa Bibliya nga Romans 13: 1-7 aron masabtan niini pagrespeto sa governing authorities sa yuta ug magtuon usab kini sa kasaysayan sa ilang lugar kun wala kini masayod niini.

Gitug-an ni Esgana nga ang gihimo ni Fr. Bucag usa ka pagsaba-saba, wala kini nirespetar kaniya isip mayor kay wala gani nipahibalo nga mohimo kini og prayer rally nga nigamit pa gyud og tambol sayo sa kaadlawon. Samtang gipabitbit pa ang mga bata sa tarpaulins nga makonsiderar nila nga usa ka matang sa child abuse.

Iya usab gihulagway nga uwahi nang nibabag ang kura paroko kay duol na kaayo ang kalihukan aron iirog ang petsa.  Pipila ka mga manindahay sa lungsod ang nipadayag nga dili pugngan ang maong kalihukan sa Semana Santa tungod kay panahon kini nga sila mokita gikan sa mga turista lokal ug langyaw nga mangabot.

Sa laing bahin han-ay na ang seguridad sa mga pantalan sa duha ka lungsod sa San Remigio ug Santa Fe sa pag-abot unya sa mga turista ug bakasyonista. - /EIM) (BANAT NEWS)