Painters daog batok Elite, pabiling way tatsa
CEBU, Philippines – Padayun ang nindot nga sugod sa kampaniya sa Rain or Shine Elasto Painters sa PBA Commissioner's Cup human nila gisakmit ang ikatulo nilang sunod-sunod nga daog batok sa Blackwater Elite,95-88, kagabii didto sa Ynares Center.
Ang Rain or Shine kasamtangan karon nga nakigsawo sa Meralco Bolts sa unang dapit sa standing sa ilang 3-0 record.
Dili hinuon sayun ang giagian sa Painters batok sa Elite human sila hatagi og lisud nga duwa sa nauwahi. Ang Blackwater milabaw pa og tres puntos halftime, 47-43, human usab mibuto sa opensa si ex-Houston Rockets forward Greg Smith.
Padayun ang sinukliay og puntos sa duha ka koponan hangtud na sa final period, apan natabla na sa Rain or Shine ang duwa sa katapusang 5:22 sa paningkamot usab nila ni James Yap ug import Shawn Taggart. Ang tres ni Jay Washington ang mihatag og komportableng labaw sa Rain or Shine sa katapusang 1:21 sa duwa.
Si Taggart maoy mibida sa Painters sa iyang 26 puntos, samtang sila si Yap ug Jericho Cruz nagkumboya og 21 puntos. Nakawang ang 34 puntos ug 20 rebounds ni Smith human makatilaw sa ikatulo nilang pilde ang Elite. – LPM (BANAT NEWS)
- Latest
