Ang seks nga makapalagsik (1)

Pipila sa atong napanid-an nga tungod sa naghinubra na ang paghunahuna nga nakatutok sa pagpalambo nga makabuylo alang niining kinabuhia dali ra nga naugtas og nagmaluyahon. Unsaon nataligam-an man ang kusog nga angay kanunay nga makargahan ang lawas nga molagsik sa kumbati diha sa pagseks.

Ang seks, usa ka enerhiya nga mohatag og kusog sa paglahutay. Inspirasyon kini nga mopalagsik sa panghunahuna nga bisan sa hilabihan nga kakapoy dili gayud maugtas. Makalipay kini sination nga ang kuryente nga mopabuhi sa seks maghatag ni og kalalim batyagon ang kalipay nga sa tanang oras kita molagsik.

Ang kalalim sa seks, magkalawom kini kun sa kanunay mapasagdan kini nga dili makatugsad. Kuyaw mahubsan sa lana nga mapikot ang makalipay. Dinhi motumaw ang kalaay ug kaguol nga mosangpot sa emosyonal nga ‘stress’. Maapektohan nga mopalyar ang tanan sa atong garbo ug pagkatawo.

Ang seks kabahin kini sa atong kinabuhi, sama kini sa bateriya kun ma- low bat, maluya na nga nawad-an og kusog aron makalihok.

Magkadugay, mamatay nga inutil. Busa atimana ang kanunay nga pagseks, usa kini ka maayong ehersisyo nga mopalig-on sa panagtiayon, bisan og nagkaawop na, mosilak gihapon ang pahiyom.

Bisan og ugtason pa sa labihan nga kapait sa kalisdanan, pakatam-ison gihapon nila nga saw-an ang seks nga makapalagsik, nga walay pagkupas sa pakigbisog. Kanunay madasigon sa pag-ugmad sa kinabuhing tugob sa kamalipayon.

Wala na’y gahum ang tentasyon nga moungkag sa panagtiayon nga ang kalig-on sa pundasyon, gisukad sa kinalaliman sa gugma nga gibisibisan kanunay sa kahinam sa seks nga pabiling lab-as ang alimyon sa panaghinigugmaay.

Gasa kining makalipay nga gisangkap sa atong pagkatawo gikan sa Kahitas-an ug nga palambuon kini nga dili mapasipad-an ang kabalaanon niini.