‘Sputnik’ pinabulagta

MANILA, Philippines - Hinihinalang may ka­ugnayan sa ilegal na dro­ga ang naganap na pagpaslang sa isang lalaki na miyembro ng ‘‘Sputnik Gang’’ makaraang ma-tagpuan ang bangkay nito na may isang pakete ng shabu sa isang kalsada sa Navotas City, Huwebes ng umaga.

Patuloy na inaalam pa ng pulisya ang pagkaka-kilanlan sa nasawi na nasa pagitan ng edad 20-30 taong gulang, nasa 5’3” ang taas, puno ng tattoo ang katawan kabilang ang tatak na ‘‘Sputnik’’ at ‘‘Lord Patawad’’ sa kanyang leeg. 

Sa ulat ng pulisya, dakong alas-6:30 ng umaga nang madiskubre ng isang residente ang bangkay ng biktima na nakasuot ng puting t-shirt at camou­flage na shorts sa may baywalk sa Chungkang Street, Brgy. Tanza.

Sa pagsusuri ng Nor­thern Police District Crime Laboratory, nabatid na nakabalot ng packaging tape ang mukha ng bikti­ma habang nakatali ang mga kamay.  Nakuha rin sa bulsa ng biktima ang isang plastic sachet na naglalaman ng hinihinalang shabu na inaalam kung sadyang sa kanya o itinanim lang ng mga pumaslang.

Patuloy umano ang imbestigasyon ng pulisya sa insidente.