Johnson ‘Big boss’ na sa Lakers
CEBU, Philippines - Si Earvin ‘Magic’ Johnson nga migiya sa Los Angeles Lakers ngadto sa lima ka kampiyonato sa NBA niadtong dekada ‘80, pormal nga gitudlo kagahapon isip ‘president of basketball operations’ sa maong koponan.
Dungan niini, gianunsiyo sab ni Lakers president ug part-owner Jeanie Buss nga ilang gipalagpot si general manager Mitch Kupchak ug ingon man si vice president of basketball operations Jim Buss, igsuon ni Jeanie ug anak ni kanhi team owner Jerry Buss nga nipanaw niadtong 2013.
“Effective immediately, Earvin Johnson will be in charge of all basketball operations and will report directly to me,” matud pa ni Jeanie Buss.
Ang 57-anyos nga si Johnson nga usa na karon ka Hall of Famer, naglangkob sa tinamod nga “Showtime” line-up uban ni Kareem Abdul-Jabbar nga maoy NBA all-time scoring leader. Si Johnson kabahin sa Lakers nga midominar sa NBA niadtong 1980, 1982, 1985, 1987 ug 1988. Miretiro siya niadtong 1991 human masuta nga duna siya’y HIV virus.
Alang ni Johnson, usa ka damgo nga nahatag og katumanan ang pagkabutang niya sa usa sa labing taas nga puwesto sa poder sa Lakers.
“It’s a dream come true to return to the Lakers as president of basketball operations,” matud pa ni Johnson. “Since 1979, I’ve been a part of the Laker Nation and I'm passionate about this organization.”
Bug-at hinuon nga misyon ang sagubangon ni Johnson nga mao ang pagpalig-on og balik sa Lakers nga nagkagidlay karon nga season bitbit ang 19-39 nga baraha. (BANAT NEWS)
- Latest
