Tulisan napatay

CEBU, Philippines - Human sila makapahigayon og pagpanulis, walay swerte ang usa ka tulisan kay napatay siya sa kapolisan nga iyang gikapinusilay didto sa Sitio Tapal, Barangay Guadalupe, Dakbayan sa Carcar kaniadtong Martes sa hapon.

Ang napatay mao si Loloy Esmaer, hingkod ang panuigon ug taga Barangay Linao, Dakbayan sa Talisay, samtang ang iyang kauban ug silingan nga si Joe Bryan Taburada, 23, nadakpan sa mga estambay ug gikulata.

Sa wala pa sila madakpi, sila si Esmaer ug Taburada nakapanulis pa sa usa ka lending collector didto sa lungsod sa Alcantara nga mibiktima ni Romeo Bohol, 27, taga Negros ug collector sa 24-25 Finance Corporation.

Si Bohol nakuhaan og mga P20 mil sa duha ka tulisan nga nagsakay og motorsiklo. Ang kapolisan sa Alcantara nangayo’g tabang sa ubang police station aron makapahigayon og checkpoint ug madakpan ang mga tulisan nga nagsakay’g motor. Si PO2 Lauro Laurel sa Carcar Police Station miingon nga nanawag usab kanila ang kapolisan sa Dumanjug ug nangayo’g tabang kay ang salesman nga si Joshuel Macarine gitulis sa duha ka tawo nga nagsakay’g motor ug nakuhaan og mga P10 mil.

Ang nag-checkpoint nga kapolisan sa Guadalupe, Carcar maoy naengkwentro nila ni Esmaer ug Taburada human nila giunahan sa pagpusil diha nga gipara sila samtang nagsingabot sa checkpoint ug mipabulhot hinoon sa pagpadagan.

 Atol sa ginukdanay, natumba ang motorsiklo sa mga tulisan. Ang duha nanagan, apan na-corner sila sa mga polis. Misulay pa si Esmaer pag-hostage ug tawo apan napusilan siya sa mga polis, samtang si Taburada nakadagan.

Usa ka 357 Magnum revolver ang nakuha gikan kang Esmaer ug ubang kagamitan sa ilang mga biktima. Si Taburada nadakpan ra usab sa mga tanod didto sa Barangay Bolinawan, Carcar ug nakuhaan og P5 mil. Jomari Fernandez ug Jojo C. Ugdol (BANAT NEWS)