6 tiklo sa P.2-M shabu

BULACAN, Philippines – Rehas na bakal ang binagsakan ng anim-katao na sinasabing sangkot sa drug trade makaraang salakayin ng pinagsanib na puwersa ng PDEA at pulisya ang dalawang bahay sa inilatag na drug bust operation sa Brgy. Bagong Nayon, bayan ng Baliwag, Bulacan kahapon ng umaga.

Nakatakdang kasuhan ang mga suspek na sina Reynante Serrano, 28; Rommel Serrano, 31; Mary Jane Serrano-Reyes, 24; Ronaldo Sanding, 48; Conrado Sanding, 42; at si Mary Anne Sanding, 24, mga residente ng Mapagmahal Street sa nasabing barangay.

Sa ulat na isinumite ni PDEA Region-3 Regional Officer Juvenal Azurin, sinalakay ng mga tauhan ng PDEA at pulisya kasama ang mga barangay kagawad ang magkatabing bahay ng mga suspek sa bisa ng search warrant na inisyu ni Judge Sita Jose-Clemente ng Malolos City Regional Trial Court Branch 16.

Narekober ang dalawang malaking plastic sachet ng shabu, mga drug paraphernalia, motorsiklo at traysikel na kapwa walang plaka kung saan pinaniniwalaang ginagamit sa drug trade ng mga suspek.