E.O giluwatan pag-umol sa Provincial Nutrition council

CEBU, Philippines - Si Cebu Governor Hilario Davide, III niluwat sa Executive Order No. 20 alang sa pag-umol sa Cebu Provincial Nutrition Council Technical Working Group ug nag-amendar sa tinguha sa EO No. 18 Series of 2014.

Ang probinsiya ubos sa Local Government Code adunay mandato sa pag-atiman o pagpauswag sa panglawas sa katawhan diha sa ilang hurisdiksyon.

Ang EO No. 18 Series of 2014, giisyu aron ma-reorganize ang Cebu Provincial Nutrition Council alang sa implementasyon sa kasamtangan ug  umaabot nga programa sa probinsiya kabahin sa nutrition ug pag-umol og Secretariat nga mag-monitor sa implementasyon sa mga programa.

Ang Cebu Provincial Nutrition Council Technical Working Group (CPNC-TWG) langkuban sa focal persons o representante sa pipila ka buhatan sa probinsiya ingon man sa DILG-Cebu Province, Provincial Science and Technology Center sa DOST Regional Office-VII, DepEd-Cebu Province, CPNC Secretariat ug National Nutrition Council Region VII.

Ang function sa CPNC-TWG mohatag og technical assistance ug support sa CPNC, mag-facilitate sa internal ug inter-agency coordination, mag-monitor ug mag-assist sa implementasyon sa mga policy ug programa kabahin sa nutrition sa probinsiya. Diin ang term of office sa CPNC-TWG co-terminus kini sa gobernador. (BANAT NEWS)