Reclamation sa Labogon wa napusli?
CEBU, Philippines - Wala pa gyud mapusli sa kagamhanan sa Dakbayan sa Mandaue ang 50-ektaryang luna nga reclamation project sa Barangay Labogon sukad kini naugmad niadtong 1990s.
Kini ang gibutyag ni Dr. Danilo Dionson, anak ni kanhi konsehal Magno Dionson, base sa iyang gipadangat nga suwat ngadto ni Bise Mayor Carlo Fortuna.
Matud ni Dionson nga bugtong ang ihawan lang sa siyudad ang nahimutang sa lugar.
Nagtuo si Dionson nga wala kahibawo ang kagamhanan sa siyudad kung asa ang ilang bahin gikan sa nag-ugmad nga mao ang Kimwa Construction ug Socor Construction.
May kasayuran sab si Dionson nga hangtud karon wala pay titulo ang maong reclamation project ug dili sama sa unang reclamation project nga gipaugmad ni Ernesto Ouano Sr. nga ang titulo nahatag na ngadto sa siyudad sulod sa 10 ka tuig.
Nunot niini si Dionson nangayo kang Fortuna sa kopya sa resolusyon sa konseho may kalambigitan sa proyekto, titulo kung aduna man ug ang subdivision plan sa luna nga bahin sa siyudad. (BANAT NEWS)
- Latest
