Reunion sa Street Boys

CEBU, Philippines - Nagsilbing reunion sa mga sakop sa Street Boys  atol sa kasal sa usa sa mga sakop niini nga si Meynard Marcellano didto sa Singapore. Nahugyaw ang mga bisita  sa wedding reception  gumikan sa special performance sa maong grupo  nga gilangkoban nila ni  Meynard, Vhong Navarro, Jhong Hillario.

Rhap gilabhan

Gilabhan si Rhap Salazar sa netizens gumikan sa iyang tweet  nga nakapainsulto sa mga Pinoy nga nihatag og komentaryo kalabot sa kadaogan ni Donald Trump isip presidente sa Amerika.   “Bakit masyado ka affected sa US Election, bes?,” tweet  pa ni Rhap.

Tinud-anay nga laag

Gibutyag ni Alden Richard nga first time gyud nila ni Maine Mendoza nga nanglaag sa laing nasud nga wala’y koneksyon sa trabaho busa nag-enjoy gyud sila og maayo.  Ang duha nanuroy sa Europe sa miaging  adlaw.  “Sobrang relaxing yung five days na iyon,” suma pa ni Alden.

Naanad sa  sagpa

Giklaro ni Dingdong Dantes nga parte sa iyang trabaho ang masagpaan ug naanad na siya niini.  Nasayran nga todo pasaylo kaniya si Angelica Panganiban gumikan kay nakusog ang sagpa niini sa aktor alang sa eksena nila sa pelikulang Unmarried Wife. Kahinumdoman , nakatilaw na pud og kusog og sagpa si Dingdong sa serye  niya niadto sa GMA-7 nga Ang Dalawang Mrs. Real kung diin ka-eksena niya ang diamond star nga si Maricel Soriano.

Paneguro

Paningkamotan gyud ni  Winwyn Marquez nga matuman ang iyang pangandoy nga mahimong  school teacher. Gitataw sa aktres nga maniguro na siya daan sa iyang kaugmaon ilabi na nga dili mahibaw-an ang panahon kung magdugay ba o dili ang iyang showbiz career.

Friends ra uy!

Gibutyag sa komedyanteng aktor nga si  Jobert  Austria nga  maayo na ang tinagdan sa usag-usa sa kanhi  mag-uyab nga sila si  Angelica Panganiban ug John Lloyd Cruz hinungdan nga kanunay sila mag-uban sa pagpanuroy. Giklaro ni Jobert nga wala nagbalik sila si John Lloyd ug Angelica.

Target gyud sa direktor 

Nagmalaumon gihapon si  Direk Erik Matti   nga  mahatag   ngadto kang Angel Locsin ang upcoming movie sa Star Cinema nga  Darna. Una na nga nigawas ang istorya kaniadto nga gikondisyon pa ang lawas ni Angel alang sa maong proyekto.

Jolina emosyonal

Nakahilak si  Jolina Magdangal  sa performance sa iyang bana nga si Mark Escueta ug sa iyang anak nga si Pele sa programang “Magandang Buhay”  kagahapon.  Gidalit kini alang kang Jolina kinsa nagsaulog sa iyang birthday niadtong November 6.  Sa maong special number,  nag-play og drums si Pele, samtang nagkanta si Mark og  “Malayang Magmahal” .

Dako og tsansa

Giangkon ni Arjo Atayde nga naa sila karon sa “getting to know each other stage” sa usa sa mga sakop sa grupong    Girl Trends. Dili una siya mosulti sa pangalan niini aron dili mapalaw ang iyang pagdiskarte.

Jessy naglikay kang Angel?

Gihimakak ni Jessy Mendiola ang taho nga matud pa gituyo niya ang pag-absent sa taping sa Banana Sundae sa dihang nasayran niini nga himoong guest si  Angel Locsin . Apan sa maong taping, wala madayon  ang paglugwa ni Angel gumikan sa conflict sa schedule niini.  Si Jessy maoy gidungog nga inspirasyon karon sa ex-boyfriend ni Angel nga si Luis Manzano.

Mag-uyab sa Wagas

Ang mag-uyab nga sila si  Paolo Contis ug LJ Reyes maoy bida  sa episode karong adlawa sa  Wagas . Mao kini ang hinungdan nga  tulin ra  kaayo ang dagan sa taping sa maong episode.   

Chito nangayo og sorry

Nangayo og pasaylo  ang Parokya Ni Edgar lead vocalist nga si Chito Miranda ngadto sa wala mailhing  lalaki nga naengkuwentro nila sa iyang asawa  nga si  Neri Naig sa usa ka  mall sa Dasmarinas, Cavite sa miaging adlaw.

Sa iyang Twitter post, giangkon ni Chito nga gisiko niya ang maong lalaki  human nabanggaan niini ang iyang asawa.

Nasayran nga nanulod ang magtiayon sa usa ka bookstore ug gidumugan sila sa mga tawo pagawas nila sa maong tindahan.

Gitataw sa singer nga dili siya maldito ug hambugero nga pagkatawo ug buot  lang niya proteksyonan ang iyang kapikas sa kinabuhi.

“Sorry sa siniko ko kanina. Nabangga mo kasi asawa ko. Hindi po ako masungit o mayabang, pero mas inuuna ko talaga asawa ko higit sa lahat,” tweet pa ni Chito.

Liza ipares kang Coco?

Nasurprisa og maayo si  Liza Soberano sa niulbo nga taho nga matud pa mag-uban sila puhon ni Coco Martin sa usa ka serye.

Gitataw hinuon ni Liza nga wala’y problema alang kaniya nga makauban si Coco sa usa ka proyekto.

Matud pa sa aktres nga wala pa siya’y ideya  sa maong taho ug igo ra gyud siya magpaabot sa management sa ABS-CBN.

“I’m willing to work, of course. Si Coco, he is a good actor,” matud pa sa aktres.

Sa pagkakaron, busy  si Liza sa shooting sa pelikula nila ni Enrique Gil nga ipasalida sa unang bahin karong 2017 .

“It’s a very light movie. It’s a movie where you will fall in love all over again,” nagkanayon si  Liza. (BANAT NEWS)