Sayaw kontra ilegal nga drugas
Nipakita sa ilang sayaw ang 30 ka mga dancers gikan sa Spero In Carcel o Hope In Prison sa Cebu City Jail, 20 ka dancers sa Bratanillaz Brigade sa Mandaue City Jail ug laing 20 ka mananayaw sa Island Angels Dancer sa Lapu-Lapu City Jail.
Matag grupo nagpakita og tag 30 minutos nga sayaw sul-ob ang ilang maanindot nga customes diin sila ra ang nagmugna ug adunay uban sponsored gikan sa ilang mga service provider.
Matud pa ni JSIns. Stephanny Sotero, Jail Warden sa Cebu City Female Dorm, nga ang maong kalihukan subay sa kasaulogan sa National Correctional Consciousness Week ug sa direksyon sa administrasyon ni Presidente Rodrigo Duterte ilang nahuna-huna ang pagtapok sa tanang maayong inmate dancer aron mopakita sa ilang talento ug mosabwag sa ilang programa nga pakigbatok sa ilegal nga drugas.
Sumala pa ni Sotero, kabahin sa kausaban sa mga inmates ug pag-release sa ilang stress mao ang pagsayaw hinungdan gipahigayon nila ang maong kalihukan.
Gitug-an niya nga daghan siyang mga bag-ong inmates karon kay daghan na man ang nilaya nga inmate dancers sa Spero In Carcel.
Si JSIns. Jonnabelle Roiles, jail warden sa Dakbayan sa Mandaue, nitug-an nga naglisod gyud sila pag-secure og court order apan iyang gipasabot nga ang pagsayaw maoy kinabuhi sa mga inmates, bisan sa kagamay sa ilang facility aduna gihapon silay lugar nga makapahungawan sa stress sa mga inmates pinaagi sa pagsayaw.
Samtang si JSIns. Elsie Eirieene Alcomendras, ang jail warden sa Lapu-Lapu nitug-an nga aduna gyu’y tulo ka inmates niya ang wala hatagi og pagtugot, apan ilang gihangyo ang huwes pinaagi sa paghatag og balido nga rason nga posibleng dili madayon ang ilang sayaw kun dili sila malakip kay dul-an sa buwan na man kining gapraktis, hinungdan nahatagan gyud og court order.
Ang tulo ka jail warden nitug-an nga dili kadto maoy katapusan nila nga presentasyon apan maoy sinugdanan unya diin ilaha pang panindoton ug basin ma-presentar nila kini sa publiko aron mapakita ang talento sa mga inmates. (BANAT NEWS)
- Latest
