Usa sa siyam nga nadat-ugan namatay

CEBU, Philippines - Usa sa siyam ka tawong nahunlakan sa gitrabaho nilang gitukod nga edipisyo sa Brgy. Cotcot, Lungsod sa Liloan niadtong nakalabay nga adlaw gikatahong nakabsan gyud sa kinabuhi samtang gitabang sa tambalanan.

Si Police Officer 3 Jayson Gayo sa Liloan Police Station miila sa namatay mao si Lazaro Capa, 44, tungod sa grabeng naangkong kadaut sa iyang kalawasan pagkahagsa sa estraktura.

Matud pa ni PO3 Gayo nga ang siyam ka mga trabahante dali nga gidala sa Mendero Hospital sa Lungsod sa Consolacion apan alas 4 ang takna sa hapon nabugtoan sa kinabuhi ang biktima.

Dugang pa ni Gayo nga ang mga kauban niini ang gibalhin ngadto sa tambalanan sa Dakbayan sa Sugbo ug kasamtangan karong giatiman sa mga doktor. Sa imbestigasyon nga ilang gihimo maoy ilang nasuta nga ang mga trabahante nagkamada sa mga hollow block sa maong paril bisan kun wala mahingpit ang pagkauga niini.

Dugang pa niya nga  kusog usab ang pagbunok sa ulan niadtong tungora ug maoy ilang gituohan nga nakaingon sa pagkahugno niini.

Gitataw ni Gayo nga ang mga nagdumala sa maong giugmad nga paril sa nahisgotang establisamento wala pa gihapon mopatim-aw sa ilang buhatan hasta ang mga tagtungod sa mga biktima. (BANAT NEWS)