PDAF scam ang gi-fight

Paspas kaayo karon ang Office of the Ombudsman sa pagpagawas og mga findings sa imbestigasyon nila batok sa mga magbabalaod nga gituohang nalambigit sa scam sa ilang mga Priority Development Assistance Fund .

Ang labing ulahi nga gipasakaan nila og kaso mao ang kanhi kongresista sa Eastern Samar nga gituohan nakigkunsabo sa usa ka bogus nga kahugpongan ug nabulsa ra ang kuwarta sa kagamhanan.   Ambot og unsa nay kalamboan sa gikataho nga pagkapunta usab sa P3 milyones nga PDAF ni Kongresista Luigi Quisumbing ngadto sa usa ka giingong bogus gihapon nga Non-Government Organization .

Mura'g wala man gyud ko makadungog og update niadto nga report sa Commission on Audit ug may nagsulti nako nga gitugyan na kuno ang isyu ngadto sa Ombudsman.

Nagbansiwag man gani kadto sa usa ka nasudnong pamantalaan. Naunsa na kaha ang maong kaso no?

* * *

Gi-upgrade na diay sa Ombudsman sa usa ka pormal nga imbestigasyon ang kaso nga gipasaka ni mayor Michael Rama batok ni kanhi mayor Tomas Osmeña bahin niadtong kontrobersyal nga Dodge Charger nga sakyanan.

Daghan ang nagpaabot niini. Gipasanginlan si Tommy nga midala sa duha ka Dodge Charger nga sakyanan dihang dili na siya mayor. Matud ni Rama nga gidonar sa tag-iya sa Bigfoot Entertainment ang sakyanan ngadto sa dakbayan.  Ang akong kontak sa Ombudsman miingon nga "pinagbigyan" lang nila ang complainant aron nga makapresentar og mga dukomento kon tinuod ba nga ang sakyanan gidonar gyud sa Bigfoot ngadto sa City Hall.

Apan sa Tinagalog pa, "malabo" kining kasoha nga mo-prosper. Ang higala nako sa City Hall General Service Office, mitataw nga wala diay gyud madayon ang pagdonar ni Michael Gleissner sa duha ka sakyanan.

Pagkahibawo diay ni Gleissner nga ang termino ni Tommy kutob na lang sa Hunyo 30, 2010 wa na idayon ang pagdonar. Pero huwaton nato kon makapresentar ba ang mga abogado sa City Hall og dukomento nga nagmatuod nga nadonar gyud ang mga sakyanan.

* * *

Daan pa ko nga makadaot gyud ni Mayor Rodrigo Duterte ang pakigsuod niya sa mga rebeldeng NPA. Mikatap sa Facebook ang hulagway ni Duterte nga nakiglamano sa mga NPA. Tingali ang hulagway nakuha atol sa pagbuhi sa dinakpang sundalo didto sa Butuan.  Laing nakadaot ni Duterte mao ang kahilig niya sa babaye ug ang hulagway nagpakita nga dunay babaye nga gusto ra unta magpa-selfie uban kaniya, apan gigabling ug napalingkod sa paa, dayon gihikap ang dughan sa babaye.

Daghan sa mi-comment sa Facebook nga giluoran kuno sila sa gihimo ni Duterte. Angay'ng usbon ni Duterte ang iyang kinaiya mentras may panahon pa. Tan-awa, abi nako og balwarte ni Duterte ang Mindanao, dili man diay.

Base sa report nga sa pagbisita ni Mar Roxas didto sa Lanao del Sur sa miaging semana, gipasidunggan hinuon si Mar sa mga Muslim ug gihatagan og ranggo nga Datu, nga sa ato pa, ang mga Muslim motahod na ni Mar.

Sama gud dinhi sa Sugbo nga si Tommy, gideklarar usab nga "Datu" sa mga Muslim mao nga suportado si Tommy sa mga Muslim sa Sugbo. Mao sab si Mar didto sa Mindanao. Daghan ra ba ang mga Muslim.

* * *

Si Kongresista Leni Robredo, ang kandidato pagka bise presidente sa Partido Liberal, angay'ng maninguha gyud pag-ayo kay mura'g behind siya nila ni Senador Chiz Escudero ug Bongbong Marcos sa rating.

Si Escudero nailado kay dugay na kining senador ug molansar man gani unta kini pagka presidente sa nasud, samtang si Bongbong, ilado tungod sa iyang pagka Marcos.  Ang akong mga higala nga hilig mo-analyze sa dagan sa politika, mitan-aw nga ang magtigi pagka bise presidente mao sila si Chiz ug Bongbong. Wala pa gani sila mosuroy pag-ayo aron mangampanya.

Si PNoy angay gyud nga maninguha aron dili mabentahaan ang iyang manok nga si Leni Robredo. Paabuton nato ang sunod nga survey kon kinsa na usab ang mag-una sa rating pagka bise presidente.