Aulga Hardware pabiling wa’y pilde sa upat ka duwa

CEBU, Philippines - Padayong nanghasi ang mangtas nga Aulga Hardware ug pabiling nag-una sa standing sa First Conference sa Guadalupe Golden 50s  basketball tournament human nila gipilde ang BTBA, 79-66 sa imaging adlaw didto sa Guadalupe Sports Complex.

Gipangulohan ni Boy Miñoza ang kadaugan nga miariya og 16 puntos, samtang duha niya ka teammates ang mitampo’g 10 puntos matag usa  sa Aulga Hardware, kansang 27-8 nga bentaha sa first quarter maoy gihimo nilang taming pagpanalipod sa ilang limpiyong baraha, 4-0.

Tulo sab ka players sa BTBA ang mihimo og double digits performance nga wala pa gyu’y daog sa upat ka duwa.

Sa laing duwa, ang Pardo Builders miiskor sa ikatulong daog dihang ilang gilat-an ang Tejero Bulldogs, 87-57 sa pagpangulo ni Opong Zafra nga mikabkab og 15 puntos.

Nakatampo sab og daku sila si Roy Abella ug Tony Belande nga mitimbre’g 14 ug 12 puntos matag usa sa Pardo Builders nga dominante kaayo sa maong duwa aron moposte og 3-1 record.

Ang Tejero Bulldogs nga nagtangag og 1-3 nga baraha gipangulohan sab ni Terrence Romeo nga mikawhat og 14 puntos, gisundan ni Alex Ybañez sa iyang 12 puntos ug Dede Ferraren nga adunay 11 puntos.

Sa lain pang aksiyon, ang Trangia/McMill midemolis sa Aname Homes Tungkil, 90-63 alang sa ilang 2-2 win-loss record.

Si Butch Cenabre maoy topscorer sa Trangia/McMill nga mipatuasik og 18 puntos.

Kontrolado sa Trangia/McMill ang duwa ug sayong nagselebrar sa ilang kadaugan human milansang og 68-49 nga bentaha paghuman sa tulo ka kuwarter. Miabag ni Cenabre sa opensa mao sila si Al Comendador, Alex Abano ug Elizalde nga pulos sab mihimo og double digits performance.

Bugtong si Part Rivera lang ang miiskor og double figures sa Aname Homes Tungkil pinaagi sa iyang 15 puntos.

Ang Aname Homes Tungkil nagbitbit og 1-3 nga baraha ning maong liga nga nahimo pinaagi sa paningkamot nilang Serge Cortes ug Raul Sollano.

Puntos matag usa

Unang duwa:

Trangia/McMill (90) – Cenabre 18, Comendador 16, Abano 14, Elizalde 10,  Dela Peña 8. Dela Cruz 8, Ricarte 5, Fineza 4, Gerard 3, Ylaya 2, Caburnay 2.

Aname Homes Tungkil (63) – Rivera 15, Rosaroso 9, Camota 8, Booc 7. Yares 6, Paculaba 5,  Ymas 5, Jose 3, Pistolero 2.

Ikaduhang duwa:

Pardo Builders (87) – Zafra 15, Abella 14, Belande 12, Espinosa 9. Diaz 8, Castro 7, Lim 6, Abbu 6, Rosito 4, Villarta 2, Dejacto 2, Solatorio 2.

Tejero Bulldogs (57) –  Romeo 14, Ybañez 12, Ferraren 11, Amen 6, Tudtud 4, Ocampo 4, L. Ocampo 4, Rizane 2.

Ikatulong duwa:

Aulga Hardware (79) – Miñoza 16, Bual 10, Jacaban 10, Cortes 8, Bihag 7, Diola 6, Arias 4, Posadas 4, Galon 4, Lawas 4, Aulga 2, Cabanilla 2, Bardina 2.

BITBA (66) – Chinghay 15, Cabrera 12, Ceballos 10, Rocamora 8. Honoridez 7. Caburnay 6, Caballero 4, Cabanero 2, Despi 2. (BANAT NEWS)