Linigwatay sa lana

Sa labing unang higayon karong tuiga, tulo ka buwan human nakab-ot ang kauyonan sa Organization of Petroleum Exporting Countries (OPEC) nga gipangulohan sa Saudi Arabia ug sa mga nasud nga dili sakop sa OPEC nga gipangulohan sa Russia, nitibugsok ang prisyo sa lana ubos sa $50 matag baril.

Ang labing dakong hinungdan dili na ang pagduda nga mapatuman ba ang kauyonan, kun dili, ang padayon nga pagsulbong sa produksiyon sa Estados Unidos, nga wa’y labot sa sabutsabot, kansang shale oil producers determinado nga nipabaha og dugang lana aron pagsakmit og mas dako nga bahin sa kalibutanong merkado.

* * *

Nakigtagbo ang kadagkoan sa OPEC sa Amerikanhon nga mga kompaniya sa lana aron kumbinsihon sa pagdason sa kalibutanon nga kauyonan sa paglaslas sa ilang produksiyon. Apan ang mga Amerikanhon masaligon nga ang mas bag-o nilang teknolohiya paghimo og lana gikan sa bato maoy garantiya nga dili sila kinahanglan nga moduko ni bisan kinsa.

Mao nga padayon nilang giisnab bisan ang pasidaan sa Saudi Arabia nga sila ra gihapon ang labing maalkanse kun magpadayon ang gubat sa prisyo. Kay mas barato gihapon ang lana sa Saudi ug ubang kanasuran gikan sa ilawom sa ilang mga disyerto.

* * *

Apan bisan sa pagsulbong sa produksiyon sa Estados Unidos ngadto sa 8.2 milyones ka baril sa niaging semana, nga maoy kinatas-an sukad sa pagtibugsok sa prisyo sa lana duha ka tuig na ang nilabay, kumbinsido ang mga eksperto sa industriya nga mobalik og saka ang prisyo tungod sa:

Pagtuman sa mga sakop sa OPEC sa ilang pasalig pag-iban sa produksiyon hangtod sa duha ka milyon ka baril sa lana matag adlaw nga inanay na nga naka-balanse sa 96 ka milyon ka baril matag adlaw nga kalibutanong merkado; ug

Pag-usbaw sa demanda tungod sa mas baskog nga kalibutanong ekonomiya.

* * *

Bisan ang pagpanikas sa Russia ug ubang kanasuran nga wa motuman paglaslas sa ilang produksiyon, gituohan nga mohiyos ang subra nga suplay sa lana tungod sa kaguliyang sa Libya, Algeria, Nigeria ug Venezuela.

Ang paghuyang sa pagkontrolar sa OPEC sa kalibutanong merkado sa lana mahimo nga musangpot sa dugang tidlom sa prisyo. Gikabalak-an hinuon nga kasamtangan ra ang benepisyo sa mga konsumidor, hangtod nga masabotan ang bag-ong bahinay sa merkado.

([email protected])