Shabu Sugbo

Sa pag-atubang ni Kerwin Espinosa sa Senado kaniadtong Miyerkules, giyagyag niya ang sugilanon sa iyang pagka durugista, gikan sa iyang pagka gamay nga isda ug hangtod nga nahimo siyang higanteng iho sa illegal drug trading.

Kining tanan nagsugod sa dakbayan sa Sugbo, partikular na sa sulod sa kanhi Bagong Buhay Rehabilitation Center (BBRC) diha sa Barangay Apas diin milipang ug nanalingsing ang pagka durugista ni Espinosa.

Sa bilanggoan, nagkatagbo ang dalan ni Kerwin ug ang mga banggiitan nang daan nga mga drug personality nga sila si Tata Negro, Jeffrey Diaz alyas Jaguar nga parehong patay na.

Ang pamahayag ni Kerwin nagmatuod lang nga ang bilanggoan sa Sugbo walay kalainan sa New Bilibid Prison nga nahimong salag sa shabu.

Kadtong kuwarta nga nasakmit atol sa raid sulod sa city jail niadtong nakalabay nga mga buwan, maisip ra nga momho lang diay kadto. Kumusta na man diay ang imbestigasyon nga gihimo sa Bureau of Jail Management and Penology (BJMP)? Wala pay resulta!

Wala lang kaayo mapangutana sa mga senador ang detalyado nga paghulagway sa shabu operation sa Cebu City Jail ug wala usab makonpirmar kun kakunsabo ba sa mga durugista ang mga opisyal sa bilanggoan niadtong panahona.

Nabalhin si Kerwin sa New Bilibid Prison ug didto misamot sa paglipang ang iyang drug business diin nag-concentrate siya sa Region-8.

Samtang si Jaguar nga mas beterano kang Kerwin, nagpadayon kaniadto sa pagpalambo sa illegal drugs business sa Region-7, ilabi na sa Sugbo.

Kun wala pa lang unta napatay si Jaguar sa kapolisan, mas bibo unta karon sa paghukas sa maskara sa mga opisyal sa gobiyerno nga nalambigit sa ilegal nga negosyo.

Apan dungan sa kamatayon ni Jaguar, nauban usab pagkalubong ang dakong sekreto sa shabu empire sa Sugbo.