ASPA, Prycegas daog dayon sa Casals Village cagefest

CEBU, Philippines - Kadaugan maoy misugat sa Team ASPA ug Prycegas LPG pagsugod sa ilang kampanya sa 2016 Casals Village Homeowners Association, Inc. Summer Basketball League niadtong Sabado didto sa Casals Village gym sa Barangay Mabolo, dakbayan sa Sugbo.

Ang ASPA mipakaging sa Dex Lab Disciple, 85-72, samtang ang Prycegas LPG mipatigbabaw batok sa Shaika, 59-52.

Sa wala pa ang season-opening games, ang mga nanan-aw nalingaw sa usa ka exhibition match diin ang San Remigio Properties ni playing team owner Mark Anthony Ynoc mibuntog sa University of Southern Philippines Foundation (USPF) Panthers, 52-43.

Sila si Cebu City Mayor Mike Rama ug US-based Cebuano NBA trainer/coach Jefferson Codera mihatag og dugang kahayag atol sa pormal nga seremonyas sa pagbukas uban sa mga opisyales sa Casals Village Home Owners Association nga gipangulohan sa ilang presidente nga si Engr. Ernesto Giduquio.

Ang siyam ka entranteng koponan moduwa ubos sa single round robin format diin ang top 4 moabante ngadto sa crossover semifinals. Ang top two qualifiers magabaton og ‘twice-to-beat’ incentives. Ang mga mananaog magsangka dayon sa knockout finals.

Ang makampiyon mobulsa og P15,000, samtang ang mopahiluna sa ikaduha ug ikatulong dapit modawat og P10,000 ug P5,000.  (BANAT PALARO)