Trapiko lehitimong isyu

Lehitimong isyu sa eleksiyon ang problema sa trapiko sa Metro Cebu. Lehitimo usab kining kuwestiyon sa mga botante nga maminaw sa mga pulong-pulong ug angayang dili ikyasan sa mga kandidato pagka-mayor kun adunay mangutana mahitungod niini.

Dakong isyu sa Carcar, San Fernando, Naga, Minglanilla, lahos na sa Talisay. Ilabi na sa Talisay ug Minglanilla nga ang mga mayor dinhi pakyas pa sa pagpresentar og kongkreto nga solusyon sa trapiko.

Maayo na lang ang siyudad sa Sugbo kay adunay mga propesyonal nga opisyal ug traffic enforcer sa Cebu City Traffic Unit, mao nga bisan adunay mga lugar sa siyudad nga huot ang trapiko, wala usab silay puas sa pagpatuon unsay maayong sulbad. Kanunay’ng on board ang hepe sa CCTO nga si Atty. Rey Gealon ug kauban nga si Joy Tumulak.

Apan ang kinadak-ang problema sa trapiko mao ang Mandaue. Hangtod karon, wala gyuy nakit-ang solusyon si Mayor Jonas Cortes aron iyawat makuhakuhaan ang kahuot sa trapiko sa siyudad.

Gipaabot nga mosamot ang kahuot sa trapiko sa sunod adlaw ini’g repair sa karaang Mandaue-Mactan Bridge sugod ugmang adlawa.

Kauban man unta silang Kongresista Luigi Quisumbing ug Jonas sa kampanya, apan sumala pa sa akong higalang taga-Mandaue, dili direktang makatubag si Jonas ug Luigi sa makapamalikas nga sitwasyon sa trapiko sa Mandaue.

* * *

Sumala pa sa mga Tagalog, “paraparaan lang.” Mao kini karon ang gigamit sa mga presidentiables unsaon pagsipong sa mga botante.

Si Jejomar Binay nagpirmihan sa Sugbo sa pagtuo nga mobotar niya ang mga Sugboanon bisan sa mga isyung kurapsiyon batok niya. Gi-target usab sa kampo ni Digong Duterte si Grace Poe sa pagtuo nga ang mga botos ni Grace maadto ni Digong.

Ang gi-target ni Mar Roxas mao ang nakabenepisyo sa administrasyon karon ug ang middle class nga nakasabot sa mga isyu ug nakaila niyang maoy walay bahid nga kandidato.

Ang uban molabang sa laing kampo. Sama pananglit ni Grace Poe nga nakig-alayon karon kang Bongbong Marcos sa pagtuo nga makuha niini ang boto sa mga pro-Marcos.

Ang gigamit ni Grace mao ang pag-uyon nga malubong sa Libingan ng mga Bayani ang diktador nga si Ferdinand Marcos. Unsa kahay gibati sa iyang ka-tandem nga si Chiz Escudero?

Si Chiz Escudero nga nalumbaan na ni Bongbong Marcos mao usab ang gipasanginlan nga nagpaluyo sa mga anti-Bongbong campaign sa Sugbo. Ang amigo ni Chiz nga usa ka negosyanteng Filipino-Chinese nga bagman ni Gloria Arroyo kaniadto maoy pinanser ni Chiz sa kampanya batok ni Bongbong.

Mao tingaleng gi-operasyonan ni Chiz si Bongbong kay hadlok kining adunay kamatuoran ang estoryang si Grace anak ni Ferdinand Marcos ug igsuon sa gawas ni Bongbong. Kinsa man ang magtinabangay, dili ba ang magsuon ra?