Polis gireklamo nga abusado

CEBU, Philippines - Usa ka polis gireklamo sa iyang silingan didto sa Regional Police Office-7 kay gihagit siya’g sinukmagay tungod lang kay gisingil siya sa iyang utang. Si SPO1 Walter Macasling nga nagpuyo sa Barangay Tunga, Moalboal, gireklamo ni Dennis Ereño didto sa opisina ni Senior Supt. Rey Lyndon Lawas, ang deputy regional director for operations.

Matud ni Ereño nga igo ra niya nga gisingil sa utang si Macasling apan nasuko ug mihagit kaniya’g sinukmagay. Si Ereño nahutdan na og pailob hinungdan nga iya kining gireklamo.

Si Ereño miingon nga dunay mga tawo nga gipangkulata ni Macasling didto sa Barangay Tunga, Moalboal apan nahadlok lang nga moreklamo.

Giawhag ni Lawas si Ereño nga mohimo og pormal nga reklamo batok sa polis nga nadestino sa operations branch sa Cebu City Police Office.

Gipresentar ni Ereño ang mga blotter reports nga iyang nakuha gikan sa Moalboal Police Station isip ebidensya batok kang Macasling nga daghan kini og mga reklamo. (BANAT NEWS)