Gitukod nga hangar nahugno, usa patay

CEBU, Philippines - Usa ang patay ug duha ang naangol human nahugno ang gitrabaho nga “hangar” sulod sa Mactan-Benito Ebuen Airbase sa Dakbayan sa Lapu-Lapu pasado alas-11 kagahapon sa buntag.

Patay atol sa hitabo ang steel man nga si Benjamin Muñez, 35, samtang ang mga naangol sila si Celso Gestopa, 56, ug Ramil Omolon, 36, pulos mga welders sa Caffe Engineering nga maoy nagtrabaho sa maong hangar.

Matud pa ni Police Officer 3 Lydo Pinos sa Homicide Section sa Lapu-Lapu City Police nga nahinabi sa Banat News,  samtang nagtrabaho ang tulo sa hangar sa Philippine Air Force kalit lang nahugno ang gitungtongang damba ni Muñez.

Apan gawas sa iyang gitungtongan lakip sa nahugno ang tunga nga bahin sa giporma pa lang nga mga puthaw sa hangar ug didto kini napunta ni Muñez.

Ang duha niya ka mga kauban nga nag-welding sa kilid nakaangkon og mga bun-og ug samad-samad sa lawas. Swerte sila nga nagsuot og harness ug nangabitay gikan niini.

Si Pinos mipasabot nga gumikan sa kadagko sa mga puthaw nga mitabon sa lawas ni Muñez naglisod gayod sila sa pagkuha niini maong migamit og cranes ang mga rescuers ug kasundalohan ug alas-4 pasado na sa hapon kini nakuha apan patay na.

Sumala pa ni Pinos nga sa pagkakaron ilaha pa usab nga gipaabot ang pamilya sa namatay nga mopakita sa ilang buhatan aron ilang mahibaw-an kung sila mopasaka ba og reklamo. (BANAT NEWS)