Gi-icepick sa lusonglusong patay
CEBU, Philippines - Patay ang usa ka drayber sa taxi human kini gidunggab og icepick diha sa iyang lusonglusong samtang nagdula og hantak diha sa Sitio Taytayan, Brgy. Buhisan ning Dakbayan sa Sugbo sa nakalabay nga gabii.
Ang biktima giila nga si Roy Odo Corvero, 36, nagpuyo sa maong dapit.
Matud pa ni Senior Police Officer 3 Fiel Mendaros sa Homicide Section sa Cebu City Police Office nga nahinabi sa Banat News, samtang nakighantak kalit lang kini nangayo og tabang kay kini gidunggab.
Ang mga silingan sa biktima sulay pa unta nga midala ni Corvero sa Cebu City Medical Center (CCMC) apan nakabsan gayod kini sa kinabuhi.
“Fatal kaayo na ang lusonglusong sa liog, gamay ra kaayo ang samad lagmit icepick ang gigamit ato,” matud pa ni Mendaros.
Sa pakisusi nga gihimo sa kapulisan sa nahitaboan, pulos nangambot ang mga tawo sa lugar.
Nagduda si Mendaros nga gisuyaan lang ang biktima kay wala man usab kini kontra sa maong dapit. (BANAT NEWS)
- Latest
