Kapin P1M shabu nasakmit sa ronda sa Duljo-Fatima

CEBU, Philippines - Kapin sa usa ka milyon ka pesos nga kantidad sa gituohang shabu ang nasakmit sa mga sakop sa Criminal Investigation and Detection Group-7 ug Regional Anti-Illegal Drugs Special Operations Task Group-7 atol sa managlahing operasyon nga ilang gihimo dinhi sa siyudad.

Kagahapon sa buntag ang mga sakop sa CIDG-7 mipatuman og tulo ka mga search warrants nga giisyu ni RTC Judge Soliver Peras diha sa Sitio Buli, Barangay Duljo Fatima batok nila ni Nora Abelgas, 62, Rey Ferolino, ug Franklin Pag-usara tungod sa ilegal nga drugas.

Atol sa maong operasyon si Abelgas lang ang nadakpan kay si Pag-usara nakasibat ug wa diha si Ferolino.

Sulod sa balay ni Abelgas nakuha ang usa ka dakung putos, upat ka medium ug 18 ka gagmay nga pakete sa gituohang shabu.

Sa balay ni Pag-usara nakuha sa mga polis ang pito ka mga revolvers, mga bala ug daghang shabu, samtang negatibo sa ilegal nga drugas ang balay ni Ferolino.

Dugang nadakpan

Gawas sa tulo ka mga balay gisulod usab sa kapulisan ang usa ka balay nga gikatahong giabangan sa usa ka Luz Ybañez human nakita sa mga polis ang daghang mga drug paraphernalia apan  wala ang gikatahong nag-abang niini apan adunay daghang shabu nga nakuha ang mga polis.

Laing upat usab ka mga tawo ang nadakpan sa mga polis nga sila si Marvin Del Calzada, Jonathan Javanez, Julius Ybañez ug Eric Mancao nga nakuhaan og mga drug paraphernalia human sila nanagan atol sa operasyon.

Sumala pa ni Sr. Supt. Marlon Tayaba ang hepe sa CIDG-7 nga pulos mga level 2 drug pushers ang ilang gipangronda sa maong dapit.

Ang maong operasyon kabahin sa ilang “One Time Big Time” nga operasyon lukop nasud.  Duna usa’y tulo ka mga motorsiklo ang gidala sa mga polis nga gituohang gigamit sa ilegal nga kalihokan.

Apan usa sa mga nadakpan nga 62 anyos nga si Abelgas hugot nga mihimakak sa mga nakuha nga drugas sa ilang balay.

RAIDSOTG-7

Samtang ang mga sakop sa RAIDSOTG-7 misikop usab sa usa ka 32 anyos nga lalaki diha sa Sitio Beaver, Brgy. Day-as  nga giila nga si Marvin Canucat.

Gamit ang P400 nga buy-bust money nakapalit og duha ka gagmay ka paketeng shabu ang asset sa kapulisan hinungdan nga kini gisikop. Nasakmit sa mga polis ang 125 ka mga gagmay nga pakete ug duha ka medium size nga drugas ang kapulisan nga mikantidad og P50 mil.

Jaguar sikupon

Gihagit karon ni Mayor Michael Rama ang Cebu City Police Office (CCPO) nga dakpon gyud kadtong nakaikyas sa pagpangronda sa Duljo-Fatima.

Matud ni Rama nga saludo siya ni CCPO Director Benjamin Santos kun masikop ang mga nakaiyas ug iapil si Jeffrey Diaz o mas naila nga “Jaguar” nga gipasanginlang kinadak-ang drug lord sa maong dapit.

Sumala pa sa mayor dili na kinahanglang planohon ang buhaton kung gusto gyud nila nga masikop ang mga suspetsado.

 “Ang angayan buhaton ana ayaw na mo (CCPO) pagplano kay kung makit-an ninyo si Jaguar aw diretso.Kay kung magplano daghan ang makahibalo, kay kung magplano daghan og pahibaw-on, kung magplano man gani ikaw na lang,” hagit pa ni Rama.

Sa laing bahin,  Josephine Dasig,50, ang nasikop sa kapolisan sa Presinto 2 sa Dakbayan sa Mandaue diha sa panimalay niini sa Sitio Aroma, Brgy. Subangdaku ug nakuhaan og duha ka dagkong putos, 27 ka gagmay’ng pakete  sa shabu ug drug paraphernalia nga nikantidad kapin P100 mil.

Ang operasyon gihimo sa hepe sa Presinto 2 nga si Senior Inspector Narciso Abapo pinasikad sa search warrant nga giluwatan ni Judge Teresita Galanida sa Branch 56 sa Regional Trial Court. (BANAT NEWS)