Ubang seniors may pang-Valentine’s Day

CEBU, Philippines - Sayo nga ipangapod-apod sa kagamhanan sa Dakbayan sa Sugbo ang financial assistance sa mga senior citizens ug persons with disability (PWD) aron malipay atol sa Valentine’s Day.

Sugdan ang pagpanghatag ngadto sa mga senior citizens karong Biyernes sa Plaza Sugbu duol sa City Hall.

Magsugod kini sa alas otso sa buntag hangtud sa alas 12 sa udto ug mopadayon sa Lunes sa sunod semana.

Ang mga dili makakuha sulod sa 15 ka adlaw sukad sa gitakda’ng petsa sa pagpanghatag mamahimo gihapon nga makakuha apan ngadto na sa Treasurer’s Office sa City Hall.

Giawhag ni Dr. Lucelle Mercado ang tanang beneficiaries nga mosayo sa pag-adto aron dili kaayo mainitan bisan og adunay mga tulda nga gibutang sa lugar.

Giawhag usab sila nga mosayo ug dili na maghuwat pa sa laing adlaw nga lugway.

“Og mahimo claim gyud ini’g Friday. Ayaw paghuwat ana’ng extensions kay it would be inconvenient in your part. Kung adto sa Treasurer’s Office, gamay ra ang lugar,” matud ni Mercado.

Mas nidaghan ang mga beneficiaries karong tuiga nga moabot sa dul-an sa 7,000 ka senior citizens gikan sa 80 ka barangay sa Dakbayan sa Sugbo.

Ang mga senior citizens makadawat og tag P2,000 nga financial assistance.

Ang mga PWD makadawat usab og tag P1,000 ug sugdan ang pagpangapod-apod sa tagsa-tagsa ka barangay karong Lunes. (BANAT NEWS)