Upat ka bata nalumos
CEBU, Philippines – Upat ka bata ang nangalumos sa usa ka pribadong swimming pool sa Sitio Lotao, Barangay Labangon lungsod sa Tabogon kagahapon sa hapon.
Ang mga namatay naila nga sila si Mary Ann Precillas, 10, Ronel Prescillas, 6, Negene Montuerto, 8 ug Nelyen Mandaue, 8, pulos managsilingan sa maong barangay.
Matud pa ni Police Officer 1 Renices Lequin ang desk officer sa Tabogon Police nga nahinabi sa Banat News pasado alas-5 sa hapon nananghid ang mga bata nga manguha og bayabas.
Apan gabii na lang wala pa sila mabalik hinungdan nga gipangita sila ug nakit-an ni Eugene Montuerto ang anak nga si Negene kauban ang tulo nga naglutaw na sa swimming pool ug wala na’y kinabuhi.
Gituohang nadakin-as ang mga bata sa swimming pool nga gilumotan na og maayo ug naglisod sa pagkawas hangtod nangalumos.
Ang maong swimming pool gipanag-iya sa usa ka Marvie Subing-subing nga naminyo og usa ka langyaw ug wala ‘sab kini koral ug wala na puy-i.
Si Lequin miawhag nga kuhaan og tubig ang maong pool aron dili na masubli ang maong hitabo. – /EIM (BANAT NEWS)
- Latest
